Vandalizimet ndaj xhamive në Evropë kanë vazhduar me sulme të reja ndaj dy xhamive në Holandë dhe Gjermani.
Në sulmin ndaj xhamisë Milli Gorus në Tilburg të Holandës, e cila vepron në kuadër të Federatës Islame të Holandës (NIF), një sulmues ka thyer xhamin e faltores dhe ka hyrë brenda, duke dëmtuar gjësendet.
Kryetari i Fondacionit të Xhamisë, Recep Alakus, dënoi sulmin duke shtuar se për herë të parë ballafaqohen me një gjendje të tillë në Tilburg.
Alakus njoftoi se sulmi ka ndodhur gjatë orëve të natës.
“Sipas pamjeve nga kamera e sigursë, ne pamë se një person i paidentifikuar ka hyrë brenda xhamisë duke thyer xhamin pranë derës së hyrjes dhe ka dëmtuar gjësendet aty”, tha ai.
Ai theksoi se ende nuk e dinë motivin prapa sulmit dhe shtoi se tashmë kanë denoncuar rastin në polici duke ndarë edhe pamjet e kamerës së sigurisë.
– Digjet flamuri para xhamisë në Gjermani
Ndërkohë, një sulm tjetër ka ndodhur edhe ndaj Xhamisë Qendrore në Karlsruhe pranë Unionit Turko-Islam për Çështje Fetare (DITIB).
Në sulmin që ka ndodhur gjatë orëve të natës është dëmtuar njëri nga shtyllat me flamuj dhe është djegur flamuri me logon e DITIB-it, njoftoi unioni.
Ndryshe, vandalizime ndaj xhamive dhe qendrave islame nëpër vende të ndryshme të Evropës kanë ndodhur edhe më herët.
Turqia tashmë ka shprehur shqetësime për rritjen e numrit të sulmeve të tilla, duke bërë thirrje për zgjidhjen e situatës alarmante për shkak të rritjes së islamofobisë dhe ksenofobisë./AA
