Në qendrën memoriale të Suharekës sot do të varrosen edhe katër mbetje mortore të identifikuara gjatë vitit të kaluar të familjes Berisha.
Qyteti i Suharekës të enjten do të kujtojë viktimat e 26 marsit të vitit 1999 ku 45 anëtarë të familjes Berisha u ekzekutuan mizorisht nga forcat serbe.
Një akademi përkujtimore do të mbahet në mesditë në Shtëpinë e Kulturës dhe më pas qytetarët do të bëjnë homazhe te qendra memoriale ku janë varret e familjes Berisha, raporton Kallxo.com.
Në këtë qendër do të rivarrosen edhe katër mbetje mortore të familjes Berisha të cilat u identifikuan gjatë vitit të kaluar. E fundit që u identifikua ishte Arta Berisha.
Anëtarët e familjes Berisha së pari ishin ekzekutuar në një lokal të vogël në qendrën tregtare të qytetit dhe më pas trupat u larguan në drejtim të Prizrenit. Gjatë rrugës, nga kamioni kërcejnë dy gra dhe një fëmijë, dëshmitarë të ngjarjes, shkruan Kallxo.com.
Kryetari i shoqatës për persona të pagjetur “Shpresimi”, Hysni Berisha tha se janë edhe 18 viktima tjera që ende konsiderohen të zhdukur.
“Trupat e këtyre qytetarëve fillimisht janë groposur në Prizren, pastaj trupat janë bartur me një kamion frigorifer i gjuajtur në Danub dhe në fund u zbulua në poligonin e qitjes së njësisë special të policisë serbe në Batajnicë”, tha Berisha.
Berisha ka dëshmuar kundër Sllobodan Millosheviqit në vitin 2002 në Hagë për masakrën e familjes Berisha në Suharekë.
Suhareka ishte sulmuar edhe një ditë më herët, 25 mars ku në disa vende të ndara ishin vrarë 130 qytetarë e të varrosur te varret e Berishve, në rrugë të Peqanit, varrezat e Kuqve dhe në Shirokë./Indeksonline
