Aktivistët e opozitës siriane lajmëruan të dielën se me dhjetëra trupa të pajetë u gjetën pranë një qyteti në afërsi të kryeqytetit Damask, në atë që përbën masakrën e radhës së trupave të presidentit Bashar al-Assad.
Sipas opozitës, viktimat e zbuluara në qytetin e Derias ishin ekzekutuar të gjitha gjakfohtësisht.
Një raportim i pakonfirmuar foli për mbi 200 trupa të zbuluar nëpër banesa, vendstrehime dhe bodrume të ndryshme.
Mediat ndërkombëtare e kanë të pamundur të verifikojnë vërtetësinë e këtij lajmi, për shkak të mungesës së aksesit në zonë.
Megjithatë, Televizioni Shtetëror Sirian deklaroi se “Deraja është pastruar nga mbetjet e fundit të terrorizmit”..
Lajmi për masakrën e tmerrshme në Deraja vjen pas lëshimit të një ofensive të gjerë frontale të ushtrisë së rregullt mbi pozicionet e kryengritësve në qytet ditën e shtunë.
Ofensiva nisi pas dhjetë ditësh bombardimi intensiv, që dobësuan dukshëm pozicionet e rebelëve, të shpërtalluar më pas nga ndërhyrja e vendosur e ushtrisë.
Besohet se të ekzekutuarit ishin robër lufte dhe civilë.
