“Në emër të Top Channel kam kënaqësinë t’iu ofroj cmimin për anketën Personazhi i Vitit 2012”. Këto ishin fjalët e Igli Gjelishtit, webmaster-it të Top Channel në momentin e dorëzimit të cmimit për grupin e alpinistëve që ngritën flamurin shqiptar në “çatinë e botës” në maj të 2012-ës.
“Falenderojmë televizionin Top Channel dhe gjithë publikun që na mbështeti për Personazhin e Vitit”, tha Fatjon Plaku, alpinist.
Ata morën numrin më të madh të votave në anketën e përvitshme që Top Channel organizon në faqen e tij të internetit për të përzgjedhur personazhin më të spikatur të vitit.
Gerti Pishtari, alpinist: Është një kënaqësi e vecantë që vlerësohemi me këtë cmimin. Në një farë mënyre tregon që puna dhe mundi ynë, përvoja që kaluam, që ishte goxha e vështirë për atë ngjitje u shpërblyen. Dua të falenderoj ata që na votuan.
Gjergj Bojaxhi, alpinist: Duke marrë parasysh që kjo është një nga ngjitjet më të vështira në sportin e alpinizmit do të doja të falenderoja publikun shqiptar që ka vlerësuar këtë përpjekje dhe dedikim të jashtëzakonshëm që gjithë ekipi i Everestit ka dhënë në kapjen e majës për 100-vjetorin e Pavarësisë.
Erli Rrudho, alpinist: Falenderoj Top Channel për cmimin Personazhi 2012 si dhe njerëzit që na votuan dhe përkrahën në nismën tonë për Everestin.
Pas ekspeditës dy-mujore në Everest dhe ngjitjes për pesë ditë në majën më të lartë të botës në kushte ekstreme, alpinistët vazhdojnë stërvitjen për t’u përballur me sfida të tjera.
