Policia e Kosovës njofton se gjatë muajit që shkoi janë ndërmarrë disa operacione në disa vende ku dyshohej se ushtrohej prostitucion.
Për shkak të parregullsive 38 lokale që ushtronin veprimtari për masazhe janë mbyllur përkohësisht nga Inspektorët e Inspektoratit përkatës.
Nga inspektoret e ATK-së, të MTI-së, të Punës dhe Inspektorët Komunal janë shqiptuar gjoba për parregullsitë e hasura.
Janë legjitimuar të gjithë punëtoret e hasur në këto qendra të masazheve dhe të gjithëve iu është ofruar mundësia të deklarohen nëse janë në ndonjë formë Viktima të Trafikimit.
Janë hasur duke punuar dhe qëndruar në Kosovë pa leje qëndrim dhe leje pune pesë femra, shtetase të Shqipërisë ( të gjitha janë dorëzuar Drejtorinë për Migrim dhe të Huaj).
Operacionet janë realizuar në tri rajone Prishtinë, Prizren dhe Pejë.
Plani operativ kishte për qëllim luftimin e informalitetit dhe identifikimin e viktimave të mundshme të trafikimit dhe gjatë realizimit të tij janë inspektuar 63 Lokale/sallone Masazhi dhe kanë rezultuar të gjeturat si në vijim:
Disa nga këto lokale/masazhe nuk kanë qenë fare të regjistruara në ATK si biznese, nuk kanë poseduar asnjë dokumentacion,
Shumica nga to (lokalet) nuk kanë poseduar arka fiskale,
Nuk kanë pasur pëlqime nga komuna për ushtrim të veprimtarisë ekonomike,
Nuk i kishin të deklaruara punëtoret,
Pa kontrata pune për punëtoret që i kishin punësuar,
Punonjëset në shumicën e lokaleve kanë qenë pa kualifikim,
Nuk e kanë të deklaruar qarkullimin ditor-mujor,
Nuk posedonin pëlqim sanitar,
Mungonin libreza sanitare,
Janë hasur të punësuara femra të mitura nën moshën 18 vjeçare etj.
