Parlamenti i Austrisë miratoi ligjin për konfiskimin e shtëpisë ku ka lindur diktatori nazist Adolf Hitler.
Ndërkohë nuk bëhet me dije se çfarë funksioni do të ketë ndërtesa e cila ndodhet në Braunau. Ligjvënësit austriakë e kanë ndërmarrë masën në fjalë me qëllim që të parandalojnë kthimin e ndërtesës në vend pelegrinazhi për mbështetësit neonazistë.
Pas votës së mbrëmshme, ndërtesa i merret pronares aktuale e cila kishte refuzuar planin e qeverisë për të vendosur një bamirësi sociale ose një autoritet qeveritar në ndërtesën trekatëshe. Mësohet se gruaja në fjalë do të marrë një pagesë kompensimi nga shteti austriak.
