Në Klinikën e Neurokirurgjisë së Qendrës Klinike Universitare të Kosovës, është operuar me sukses pacienti N. Elshani, rast tejet i rrallë, me tumor 5 kilogramësh që përveç trurit, kishte përfshirë edhe pjesët e tjera të fytyrës.
Operacioni ka zgjatur më shumë se 10 orë dhe është kryer me datën 26 të këtij muaji, nga ekipi i mjekëve i udhëhequr nga Prof. dr.Arsim Morina, neurokirurg, Dr. Agim Berisha, kirurg plastik, Dr. Agon Meka, Dr. Qamile Morina, anesteziologe, Dr. Imer Sejdiu, instrumentarja Sanije Dervishi dhe tekniket e anestezionit Alldina Suljmani dhe Sadete Arifi.
Pacienti Elshani kishte tumor të turit që kishte përfshirë ashtin dhe lëkurën, duke dalë jashtë lëkurës duke penguar edhe pjesën e poshtme të fytyrës.
Në foto shihet se si dukej pacienti para operacionit dhe si duket pas operacionit i cili zgjati mbi 10 orë.
I njëjti pacient më herët ishte kërkuar ndihmën mjekësore në Tiranë, Shkup e Beograd, por për shkak të rrezikshmërisë së madhe i ishte thënë se nuk mund të operohet.
Në lidhje me këtë rast, nesër ( e martë) në ora 12:00, në Klinikën e Neurokirurgjisë do të organizohet konferencë për media ku do të jepen detaje shtesë rreth rastit në fjalë./indeksonline/
