Danimarka njihet si shteti që ka më së tepërmi konsideratë për mbrojtjen e ambientit, duke qenë prej të parave vende që ndalon shishet dhe qeset prej plastike, si dhe që ofron investim në opsione të padëmshme për mjedisin.
Por a mundet një vend që teorikisht, të ulë emetimet e karbonit (CO2) siç ka arritur ky vend?
Qyteti i Kopenhagës i ka vënë vetes një kusht shumë ambicioz: dëshiron të bëhet kryeqyteti i parë në botë që neutralizon karbonin. Deri në vitin 2025, Kopenhaga ka shumë për të bërë.
Dhe tashmë, nisma ka kapur rrugën e duhur: Emetimet e CO2 në Kopenhagë janë ulur me 42% që nga 2005-ta.
Në një raport nga këshilli i qytetit, thuhet: “Kopenhaga do të jetë pararojë e politikave të ndryshimit të klimës me gjithçka, duke nisur nga turbinat e erës, teknologjia e re e gjelbër dhe transporti në zonat mjedisore, ushqimet dhe kushtet më të mira të çiklizmit”.
Buxheti i qytetit për vitin 2020 po shton rreth 18 milion euro për të miratuar politika më të mira klimatike.
“Ne po bëjmë një hap tjetër ambicioz në mënyrë që Kopenhaga të bëhet kryeqyteti i parë neutral në botë sa i përket emetimit të CO2”, thuhet në raport.
Për të arritur këtë qëllim, Kopenhaga do të “promovojë trafik të qëndrueshëm dhe të investojë masivisht në turbinat me erë dhe teknologjinë e re”, thuhet në raport.
Qyteti gjithashtu do të sigurojë parkim falas në rrugë për veturat elektrike dhe do të rrisë çmimin e tarifave të parkimit dhe licencat e qëndrimit për makinat që ndotin më shumë.
“Qëllimi është të kufizojmë përdorimin e benzinës dhe të ndalojmë makinat me naftë”, vuri në dukje raporti. “Nga 1 korriku 2020, zona mjedisore në Kopenhagë do të përforcohet në mënyrë që as kamionët ndotës të mos lejohen të hyjnë në qytet.”
Kopenhaga tashmë është një nga qytetet më të mira të çiklizmit në botë, por kjo nuk është e mjaftueshme për danezët: bashkia tani po ndërton shtigje të reja biçikletash dhe madje edhe “dy shtigje super biçiklete”./tesheshi.com/
