Drejtuesit e Laboratorit kërkimoro-shkencor në qytetin e Galvenston, shteti i Texas-it (Galvenston National Laboratory), njoftuan mbi zhdukjen e një epruvete që përmbante virusin vdekjeprurës “Guanarito”.
Sistemet e sigurisë së laboratorit, ku epruveta në fjalë ruhej e kyçur me dryn, nuk fiksuan asnjë shkelje. U vërtetua se asnjë person i huaj nuk ka hyrë brenda në laborator. Drejtuesit e laboratorit e konsiderojnë të pamundur faktin që epruveta të jetë vjedhur. Ka shumë gjasa që atë ta kenë hedhur së bashku me mbeturinat.
Sipas të dhënave të gazetës “USA Today”, virusi mund të përdoret si një armë biologjike. Ndërkohë, autoritetet deklarojnë se epruveta nuk paraqet asnjë rrezik.
