Me dhembje e lot, në 19 vjetorin e vrasjes më çnjerëzore të 77 shqiptarëve, qyteti i Vushtrrisë sot ka bërë homazhe dhe ka nderuar qytetarët e tij, jeta e të cilëve u këput nga forcat policore, ushtarake dhe paramilitare serbe.
Sot 19 vite, pas kësaj plage të rëndë të luftës, kryetari i Komunës, Xhafer Tahiri tha se qyteti i Vushtrrisë nderon ato që dhanë jetën për liri.
“Të gjitha këta njerëz të mirë të Vushtrrisë e të Kosovës u vranë vetëm për një arsye: ata ishin shqiptarë, refuzuan nënshtrimin dhe refuzuan që të braktisin tokën e tyre, shtëpitë e tyre. Ata si i gjithë populli i Kosovës e kishin kuptuar që regjimi i Millosheviqit kishte synim dëbimin dhe spastrimin trojeve etnike shqiptare, prandaj vendosën që të qëndrojnë e me gjakun e tyre dhe me jetën e tyre njomën lirinë e pavarësinë e Kosovës”,tha Tahiri.
Nga ky tubim përkujtimor, kryetari Tahiri ka kërkuar nga drejtësia vendore dhe ajo ndërkombëtare që fillimisht ta zbardh rastin e vrasjes çnjerëzore të 77 qytetarëve të Vushtrrisë, e më pas edhe të fshehjes së krimit duke i varrosur trupat e tyre në varrezë masive në Beograd.
Me 22 maj të vitit 1999 brenda pak orësh në qytetin e Vushtrrisë u vranë në mënyrën më çnjerëzore 77 persona, derisa një person tjetër ende është në listat e të zhdukurve. Të njëjtën ditë u plagosën shumë persona, e po ashtu nga forcat serbe u arrestuan edhe qindra persona qytetarë të Vushtrrisë.
Për më keq, për të fshehur gjurmët e krimit personat e vrarë dhe masakruar nga forcat serbe u dërguan në varrezë masive në poligonet ushtarake Beograd, për tu zbuluar disa vite më vonë./tg
