Sekretari i Lëvizjes Vetëvendosje, Dardan Molliqaj, ka thënë se muri në veri të vendit nuk do të rrënohet por vetëm do të shkurtohet dhe sipas tij ky është një mashtrim nga Qeveria e Kosovës.
Në llogarinë e tij në Facebook, Molliqaj ka shkruar se “Qeveria nuk ka treguar se çka nënkupton pika e tretë e marrëveshjes ku parashihet dizajni i ri që kufizon lirinë e lëvizjes në atë pjesë, ku siç po shihet, në fakt muri nuk do të rrënohet por vetëm do të shkurtohet”.
Sipas Molliqajt, çështja e veriut të vendit mund të zgjidhet vetëm me një qeveri të re, e cila do të kishte një qasje të re.
Reagimi i Molliqajt vije pas arritjes së marrëveshjes në mes të Qeverisë së Kosovës dhe Komunës së Mitrovicës së Veriut për rrënimin e murit.
Molliqaj, postimit të tij në Facebook i ka bashkangjitur edhe një foto në të cilën, sipas tij shihet vija deri ku do të shkurtohet muri në veri
Reagimi i plotë i Molliqajt në Facebook:
QEVERIA PO MASHTRON. MURI NUK PO RRËNOHET POR VETËM PO SHKURTOHET!
1. Pse duhet që Qeveria të bëj marrëveshje për heqjen e një ndërtimi ilegal, që për më tepër paraqet agresion të Serbisë në Kosovë?!
2. Pse në një rast të tillë duhet të jenë prezent edhe ndërkombëtarët?!
3. Pse Qeveria nuk ka treguar se çka nënkupton pika e tretë e marrëveshjes ku parashihet dizajni i ri që kufizon lirinë e lëvizjes në atë pjesë, ku siç po shihet, në fakt muri nuk do të rrënohet por vetëm do të shkurtohet?!
Me këtë akt, Qeveria jonë e konfirmoi edhe një herë që nuk ka sovranitet në veri dhe se kjo pjesë nuk është sikur komunat e tjera të Kosovës. Asnjë Qeveri serioze nuk do të negocionte dhe arrinte marrëveshje për akte kriminale që cënojnë sovranitetin.
Prandaj them që kjo Qeveri nuk duhet të bëj ASGJË lidhur me veriun, sepse çkado që bën (edhe nëse duket mirë në shikim të parë) është e dëmshme për shtetin. Qasja e saj avantureske na solli këtu. Çështja e veriut të vendit mund të zgjidhet vetëm me një qeveri të re që ka qasje të re.
