Lulëzimi i tregut të aksioneve ka krijuar një oreks të pashuar për fondet e tregtuara në bursë, të cilat e bëjnë të lehtë për tregtarët të investojnë menjëherë në shumë prej kompanive më të mira të botës. Ky është një lajm i mirë për BlackRock, i cili është menaxheri më i madh i parave në botë.
BlackRock, pronar i familjes së njohur të ETF-ve (fond i tregtueshëm në bursë) iShares, njoftoi se e mbylli vitin me më shumë se 10 trilion dollarë aktive nën menaxhim. Kjo është 15% më shumë nga nivelet e vitit 2020.
Gati një e treta e totalit prej 10 trilion dollarësh u investua në ETF (fond i tregtueshëm në bursë), shumë prej të cilave janë fonde pasive në familjen iShares që gjurmojnë indekset e njohura si S&P 500 dhe Russell 2000, si dhe fondet e sektorëve të ndryshëm.
Megjithatë, aksionet e BlackRock, e cila gjithashtu raportoi fitime që tejkalonin parashikimet, ranë më shumë se 2% të premten. CEO i kompanisë Larry Fink pranoi sfidat e vazhdueshme për ekonominë globale dhe tregjet financiare.
Rritja e inflacionit është duke ngrënë pagat e konsumatorëve. Rezerva Federale dhe bankat e tjera qendrore në mbarë botën pritet të ulin normat për të zbutur çmimet në rritje. Por rritjet tepër agresive të normave mund të ngadalësojnë ekonominë. Dhe varianti Omicron i Covid-19 mund të ndikojë në aktivitetin ekonomik.
Siç vuri në dukje Fink, “bota vazhdon të lundrojë në pasiguri dhe ndryshime të thella në ekonomi dhe shoqëri në përgjithësi”. /CNN – Scan Tv/
