Përleshjet dhe arrestimet ishin të shumta në Podgoricë gjatë paradës së komunitetit homoseksual “Gay Pride” në të cilën morrën pjesë qindra aktivistë LGBT të ardhur nga i gjithë rajoni, ambasadorë dhe persona publikë.
Gjatë paradës, rreth 2000 policë malazezë u gjendën përballë rreth 150 kundërshtarëve të paradës së homoseksualëve që tentuan të hynin në pjesën e qytetit ku po zhvillohej ajo.
Oficerët e policisë përdorën shkopinjtë e gomës për të shpërndarë kontestuesit e paradës, ndërkohë që këta të fundit u përgjigjën duke hedhur gurë në drejtim të agjentëve.
Pas rreth njëzetë arrestimesh, zona u mbikqyr nga helikopterët e policisë.
Parada e quajtur “Montenegro Pride” ishte e para e këtij lloji e organizuar në Podgoricë, pas asaj të korrikut të kaluar në Budva.
Muajin e kaluar, Serbia ndaloi për të tretin vit radhazi organizimin e paradës për motive sigurie, pas më shumë se 150 të plagosurve si pasojë e akteve të dhunës gjatë një organizimi të tillë në vitin 2010./ilirida/kohaislame
