Udhëheqësit dhe diplomatët e huaj morën pjesë në funeralin e Hugo Chavezit, duke iu bashkangjitur kështu qindra e mijëra qytetarëve të këtij vendi që kanë shprehur nderimet e tyre për presidentin e ndjerë.
Të pranishëm në funeral ishin edhe udhëheqës të shteteve të Amerikës Latine, si dhe aleatët: lideri i Kubës – Raul Kastro, ai i Iranit – Mahmud Ahmadinejad i Iranit dhe ai i Bellorusisë, Aleksandar Lukashenko.
Pas funeralit shtetëror të ish-presidentit Hugo Chavez, i cili ka ndërruar jetë të martën, si pasojë e sëmundjes me kancer, zëvendëspresidenti Nicolas Maduro është betuar si president i përkohshëm i Venezuelës.
Maduro ka thënë se ka kërkuar nga autoriteti zgjedhor i Venezuelës që të thërrasë zgjedhjet presidenciale sa më parë që të jetë e mundur.
Betimi i Maduros është cilësuar si shkelje e Kushtetutës nga ana e opozitës. Kjo e fundit ka thënë se detyrën e presidentit deri në zgjedhje të reja, do të duhej ta merrte kryetari i parlamentit.
Maduro ka qenë nënpresident i Chavezit dhe Chavez e ka emëruar si pasardhës të preferuar të tij.
Maduro po ashtu pritet të kandidojë në zgjedhjet presidenciale. (v.t.)
