Komandanti i Forcës së Sigurisë së Kosovës (FSK), gjenerallejtënant Kadri Kastrati, sot ka pritur komandantin e Kolegjit të Luftës të Ushtrisë së Turqisë, gjeneralmajorin Selim Mert, raporton Anadolu Agency (AA).
Në këtë takim, gjenerallejtënant Kastrati falënderoi Ushtrinë e Turqisë për mbështetjen e vazhdueshme që po i jep FSK-së, në veçanti e falënderoi Kolegjin e Luftës, për mundësinë që i ka ofruar pjesëtarëve të FSK-së për të vijuar studimet në këtë kolegj me traditë dhe nga i cili kanë dal kuadro të njohura ushtarake.
Ndërsa, komandanti i Kolegjit të Luftës të Ushtrisë së Turqisë, gjeneralmajor Mert shprehi gatishmërinë që, tradita e bashkëpunimit të mirë në mes të FSK-së dhe Ushtrisë së Turqisë të vazhdojë edhe në të ardhmen.
Në këtë takim, komandanti i Kolegjit shoqërohej nga koloneli Hasan Haydogu, atashe ushtarak në Kosovë, koloneli Omer Demircioglu, komandant i kontingjentit të ushtrisë së Turqisë në kuadër të KFOR-it dhe kolonel Gultekin Yarali, këshilltar ushtarak në Ministrinë e Forcës së Sigurisë së Kosovës.
Si mikpritës, veç gjenerallejtënant Katrsatit, përfaqësues të FSK-së në këtë takim ishin edhe gjeneralbrigade Zymer Halimi, kolonel Ilir Qeriqi, nënkolonel Fadil Hoxha dhe nënkolonel Sefer Isufi.
