Deputeti i Lëvizjes Vetëvendosje Florin Krasniqi, nuk është dëgjuar që një kohë të gjatë në Kuvend, ndërsa sot në deklarimet jashtë rendit të ditës propozoi themelimin e një Komisioni Parlamentar i cili sipas tij do të hetonte veprimtarin e Shërbimit Informativ të Kosovës ( SHIK).
“ Në bazë të rregullores së Kuvendit neni 69 dhe 71 kërkoj themelimin e një Komisioni Parlamentar që do të ishte marrë me hetimin e veprimtarisë së SHIK-ut, kjo kërkesë assesi nuk i amniston shërbimet tjera informative”, ka thënë Krasniqi.
Më pas ai kërkoi mbështetjen e deputetëve tjerë për këtë çështje pasi tha vetëm se ka filluar t’i mbledh 40 nënshkrimet e nevojshme në bazë të rregullores së Kuvendit. Deputeti Krasniqi ka dhënë disa nga arsyet se pse sipas tij SHIK-u duhet të hetohet.
“Cila ishte struktura dhe hierarkia e këtij shërbimi, si financohej ky shërbim, kush e financoj këtë shërbim sa pare morën këta njerëz, çka bënë me ato para. A krijoi dosje ky shërbim dhe për kë krijoi dosje. Mendoj se këto janë pyetjet themelore tepër të rëndësishme për popullin dhe shtetin e Kosovës”, ka thënë mes tjerash Krasniqi./indeksonline/kohaislame
