Jetëgjatësia dhe emigracioni masiv, 36 mijë gra shqiptare jetojnë vetëm
Rritja e jetëgjatësisë dhe emigracioni i lartë ka prodhuar shumë familje që kanë në përbërje vetëm një anëtar. INSTAT raportoi së fundmi se në vitin 2018 rreth 51 mijë familje kanë në përbërje vetëm një person.
Familjet me një anëtar përbëjnë 6,6 % të totalit të njësive familjare dhe fenomeni është më i përhapur tek gratë. Të dhënat tregojnë se rreth 36 mijë gra jetojnë vetëm dhe rreth 15 mijë burra.
Gratë kanë predispozitë më të lartë të jetojnë vetëm për shkak të se ato jetojnë së paku 5 vite më shumë se burrat. Një pjesë e madhe e grave kryefamiljare janë mbi të 60-tat.
Gjithashtu emigracioni i lartë dhe sistemtaik i meshkujve pas vitit 1990 e ka ulur numrin e burrave që jetojnë në Shqipëri në raport me femrat dhe kjo është nxitje tjetër pasi ka shumë familje ku një grua përbën një familje.
Nga të dhënat e Anketës së Buxhetit të Familjeve, rezulton se në vitin 2017 kishte 769.494 familjare në Shqipëri.
Njësitë familjare në Shqipëri 86,3 % kanë kryefamiljarë burra dhe 13,7 % me kryefamiljare gra. Sipas anketës, numri i grave të cilat jetojnë vetëm është 2,4 herë më i madh se ai i burrave.
Për grupmoshat e reja nën 44 vjeç, numri i burrave të cilët jetojnë vetëm është më i madh se ai i grave, ndërsa për grupmoshat mbi 44 vjeç raportet ndryshojnë dhe numri i grave që jetojnë vetëm është 2,7 herë më i madh se ai i burrave.
Numri i grave që jetojnë të vetme me fëmijët e tyre është më i lartë se numri i burrave në të njëjtat kushte, për të gjitha grupmoshat.
Zhvillimet demografike në vend kanë pësuar një tranzion të fortë që nga viti 2019. Popullsia zyrtare e Shqipërisë është tkurrur me një gati 10 për qind, teksa plaket me ritme të shpejta për shkak të uljes së lindjeve dhe niveleve të larta të emigrimit.
