Leitnant Gjenerali në pension, Michael T. Flynn është emëruar zyrtarisht si Këshilltari mbi Sigurinë Kombëtare i Donald Trump.
Por këtë zgjedhje nuk do ta kapërdijnë lehtë ata që e njohin mirë kush është Flynn, i cili akuzohet si islamofob dhe është i njohur për bindjet e tij se “SHBA-të janë në luftë me Islamin.”
Flynn kishte një rol kyç gjatë fushatës presidenciale. Ai ka shërbyer si këshilltar mbi çështjet e sigurisë kombëtare. Megjithatë, përpara pjesëmarrjes së tij në fushatë, ai ka qenë Drejtor i Defense Intelligence Agency, një post të cilin ia kishte dhënë presidenti Obama. Ai u tërhoq nga detyra në prill të 2014-ës, një vit para se t’i mbaronte mandati.
Ai ka shërbyer gjatë luftërave në Afganistan dhe Irak si drejtor i inteligjencës për Komandën e Operacioneve Speciale të Përbashkëta nga viti 2004 deri në 2007. Ka mbajtur të njejtën detyrë për Forcën Ndihmëse mbi Sigurinë Kombëtare në Afganistan nga 2009-2010.
Por cilat janë qendrimet e tij ndaj Islamit?
Flynn është në bordin drejtues të ACT for America, një organizatë e cila konsiderohet një nga grupet më të mëdha anti-muslimane në Amerikë.
Flynn ka deklaruar në muajin gusht se Islami është ideologji politike që fshihet pas një feje.
Gjatë një fjalimi në një aktivitet të organizuar nga ACT for America në Dallas, ai i tha audiencës së nuk e shikonte Islamin si fe, por si një “kancer”. “Islami është një ideologji politike. Ai fshihet pas një feje,” ka deklaruar Flynn. Ndiqni videon:
Ai ka shkruar në librin e tij “Fusha e Luftës: Si mund ta fitojmë luftën globale kundër Islamit Radikal dhe aleatëve të tij”, se militantët islamistë “pijnë gjakun e armiqve të tyre”.
“Ne jemi në luftë me një lëvizje masive mesianike të disa njerëzve të ligë, ku shumica e tyre janë të frymëzuar nga një ideologji totalitare: Islami radikal”, ka shkruar Flynn në librin e tij. Po aty, ai e ka përshkruar Islamin si “Ideologji politike” e jo si fe. Madje, ai shpesherë i referohet “armikut të Amerikës” thjeshtë si “Islami”, duke zbehur dallimin ndërmjet radikalizmit, Islamit dhe atyre muslimanëve që nuk kanë asnjë lidhje me ideologjitë ekstremiste.
Flynn ka deklaruar se ai “ka një dekadë që është në luftë me Islamin”. Ndiqni videon:
Kur u pyet gjatë një interviste për Al Jazeera-n në janar 2016 nëse ishte i vetedijshëm se retorika e tij i shërbente ISIS-it, ai deklaroi: “Ne jemi në luftë me një komponent radikal të Islamit. Prandaj, unë besoj se Islami në vetvete është një ideologji politike e bazuar në një fe.”
Flynn ka shkruar se bota muslimane është një “dështim epik” krahasuar me perëndimin.
Ai ka shkruar në një opinion të publikuar në New York Post se “të gjithë” – përfshirë “shumicën e muslianëve” – e dinë se “bota islame është një dështim epik”. Kur është pyetur për “vetingun” e propozuar nga Trumpi kundër emigrantëve muslimanë, ai është shprehur se e mbështet këtë ide.
Për më tepër, ai nuk e ka fshehur armiqësinë e tij ndaj Islamit, duke u shprehur se “frika ndaj Islamit është racionale”.
Sipas studiuesit amerikan të feve, Reza Asllan, trajtimi i Islamit si ideologji e jo si fe është një lojë e rrezikshme pasi i “zhvesh” qytetarët amerikanë muslimanë nga mbrojtja që u siguron kushtetuta për lirinë e praktikimit të fesë.
Përgatiti: Enes Neza – /tesheshi.
