Forcat izraelite të enjten arrestuan tre të punësuar të Autoritetit të Çështjeve Fetare të Kudsit, bëjnë të ditur zyrtarët.
Firas al-Dibs, zëdhënësi i autoritetit jordanez, në një deklaratë tha se tre të arrestuarit u ndaluan përderisa po kryenin një restaurim të vogël në oborrin e xhamisë Al-Aksa.
Të arrestuarit u identifikuan dhe bëhet fjalë për Bassam Al-Hallaq, kryesuesi i Komitetit për Rikonstruimin e xhamisë Al-Aksa, ndihmësi Taha Aweida dhe një i punësuar tjetër.
Zëdhënësi Al-Dibs e përshkroi aksionin izraelit si “intervenim në punimet e tyre restauruese”.
Policia izraelite akoma nuk ka komentuar ndodhitë.
Për muslimanët, Xhamia Al-Aksa është vend i tretë i shenjtë për nga rëndësia. Në anën tjetër, hebrenjtë besojnë se në atë vend ndodheshin dy tempuj të tyre.
Izraeli pushtoi Jerusalemin lindor, ku ndodhet xhamia Al-Aksa, gjatë luftës arabo-izraelite të vitit 1967.
Përmes një lëvizjeje që asnjëherë nuk u njoh nga komuniteti ndërkombëtar, Izraeli aneksoi tërë qytetin në vitin 1980, duke pretenduar se është kryeqyteti “i përhershëm dhe i pandashëm” i shtetit të vetëshpallur izraelit./AA
