Ministri i Punëve të Jashtme i Republikës së Kosovës, Enver Hoxhaj, të martën ka pranuar një telefonatë nga ministri i Punëve të Jashtme i Turqisë, Ahmet Davutoğlu.
Davutoğlu ka përgëzuar ministrin Hoxhaj për marrëveshjen e arritur për normalizimin e marrëdhënieve ndërmjet Republikës së Kosovës dhe Republikës së Serbisë.
Nga ana tjetër, ministri Hoxhaj ka falënderuar homologun turk për mbështetjen që i kanë dhënë procesit të dialogut, procesit të njohjeve dhe anëtarësimit të Republikës së Kosovës në organizata ndërkombëtare.
“Dy ministrat janë pajtuar se kjo marrëveshje do të forcojë shtetësinë e brendshme dhe pozitën ndërkombëtare të Republikës së Kosovës, duke theksuar rëndësinë e implementimit të saj”, thuhet në komunikatën për media.
Në këtë drejtim, Turqia ka shprehur gatishmërinë që të ndihmojë në procesin e implementimit të marrëveshjes.
Ministri i Jashtëm i Kosovës, Enver Hoxhaj, po ashtu e ka falënderuar homologun turk për mbështetjen e madhe që po jep Turqia për zhvillimet në Kosovë, mbështetjen në kuadër të KFOR-it dhe EULEX-it, por edhe mbështetjen në fushën e zhvillimit ekonomik, bashkëpunimit tregtar dhe shkëmbimeve në arsim, shkencë, teknologji dhe kulturë. /Tg/kohaislame
