Alison Kosnett, gruaja e ambasadorit amerikan në Kosovë, Philip Kosnett, ka komentuar rreth ç’kapjes së shtetit të Kosovës, për të cilën gjë ka thënë se është i mundur.
Kosnett duke komentuar rreth një intervistë të kryeministrit Albin Kurti, ka thënë “Ai ka të drejtë, ç’kapja e shtetit të Kosovës është e mundur”.
Pyetjes në profilin e saj në Facebook, se kush është ai që ka të drejtë, Alison është shprehur se ai është “kryeministri në detyrë, Albin Kurti”.
Në profilin e saj në Facebook ka pasur edhe komente tjera.
Gazetarja Jeta Xharra, pas këtyre komenteve të Alison, i ka shkruar se a mund t’ia transmetoj këtë burrit të saj, ambasadorit Philip Kosnett.
I menjëhershëm ishte reagimi i gruas së ambasadorit, e cila u përgjigj “po, çdo moment”.
Alison Kosnett më tej në përgjigjet e saj për komentuesit tjerë thotë se ka nevojë për më shumë përgjegjësi dhe transparencë dhe të gjithë duhet ta ngritin zërin për këtë.
“E ardhmja e Kosovës kërkon zërin e gjithsecilit, e jo vetëm të Albinit”, shkruan ajo.
Por, një ditë para rrëzimit të Qeverisë Kurti, ambasadori Kosnett kishte mbështetur seancën për mocionin e mosbesimit.
Ambasadori i Shteteve të Bashkuara të Amerikës në Prishtinë, Philip Kosnett, ka thënë se i vjen mirë që në Kuvendin e Kosovës, do të mbahet seanca për votimin e mocionit të mosbesimit ndaj Qeverisë.
Ambasadori kishte pohuar se është e rëndësishme që të gjitha institucionet e Kosovës ta respektojnë Kushtetutën.
“Jam i kënaqur të shoh që Kuvendi do të mbajë nesër seancën për votimin e mocionit. Siç i kam thënë kryeministrit sot, është e rëndësishme që Kuvendi dhe të gjitha institucionet e Kosovës të respektojnë Kushtetutën”, kishte shkruar Kosnett në Twitter.
