Sot në Katalonia po mbahet një referendum për pavarësinë e rajonit nga Spanja, pavarësisht se proçesi është konsideruar joligjor nga qeveria qendrore dhe Gjykata Kushtetuese.
Mbrojtësi i Barcelonës Gerard Pique nuk i ka fshehur kurrë pikëpamjet e tij politike dhe ishte ndër të parët që ka mbështetur vendimin për referendumin.
Dhe ndërsa forca speciale e policisë po përpiqen të parandalojnë mbajtjen e këtij referendumi, në shumë vendvotime qytetarët dolën dhe dhanë votën e tyre.
Një prej votuesve është Pique, i cili në Barcelonë kreu detyrën e tij qytetare. “Unë votova. Së bashku jemi të pandalshëm në mbrojtjen e demokracisë”, tha ai përmes twitter.
Në referendum votoi edhe ish-kapiteni i Barcelonës Carles Puyol, i cili në twitter ishte shumë i qartë: “votimi është demokraci”.
Ndërsa futbollisti legjendar Xavi ka dërguar një video-mesazh nga Katari, në të cilën ai i kërkoi qeverisë spanjolle që të tërheqë forcat e policisë dhe të lerë njerëzit të votojnë.
Gjithashtu, mediat spanjolle raportojnë se ndeshja mes Barcelonës dhe Las Palmas-it e planifikuar për 16:15, mund të shtyhet për shkak se drejtuesit e klubit mysafir kanë vendosur flamurin spanjoll në ndresat e lojtarëve, duke u shprehur kështu mbështetje autoriteteve të Madridit. /tesheshi.com/
