Njerëzit në të gjithë botën po bëhen gjithnjë e më të zemëruar, më të stresuar dhe më të shqetësuar. Ky është përfundimi i një studimi të ri global të kryer nga Gallup.
Nga rreth 150 mijë njerëzit e intervistuar në më shumë se 140 vende, një e treta thanë se ata vuanin nga stresi, ndërsa të paktën një në pesë përjetonte trishtim apo zemërim.
Raporti i përvitshëm i emocioneve i Gallup ka pyetur njerëzit për përvojat e tyre pozitive dhe negative. Vendi më negativ ka qenë Çadi, i pasuar nga Nigeria.
Vendi më pozitiv, në anën tjetër, ishte Paraguaji. Kërkuesit u fokusuan tek eksperiencat e pjesmarrësve një ditë para sondazhit. Intervistuesve u bënë pyetje si: “A keni qeshur dje?” dhe “A jeni trajtuar dje me respekt?”, në një përpjekje për të marrë një panoramë mbi eksperiencat e përditshme të njerëzve.
Sondazhi zbuloi se nivelet e stresit ishin të larta ndërsa nivelet e shqetësimit dhe trishtimit po ashtu janë rritur. 39 për qind e të anketuarve thanë se janë të shqetësuar dhe 35 për qind të stresuar.
Vendet e Amerikës Latine, përfshirë Paraguajin, Panamanë dhe Guatemalën kryesonin listën e eksperiencave pozitive. Ndërsa Çadi dhe të tjera vende afrikane renditeshin në skajin e kundërt. Greqia ka popullatën më të stresuar në botë me 59 përqind të të anketuarve që thoshin se kanë përjetuar stres një ditë para sondazhit.
Rreth 55 për qind e amerikanëve të rritur po ashtu thanë se ishin të stresuar.
Shqipëria nuk përmendet në raportin e Gallup, megjithatë, në hartë ajo paraqitet me ngjyrë të gjelbër të errët, çka e rendit atë mes vendeve jo pak të stresuara./dita
