PARIS- Presidenti francez Francois Hollande deklaroi dje se Franca do të tërheqë trupat nga Afganistani. Vendimi u mor pak orë pasi 4 ushtarët francezë mbetën të vrarë dhe 5 të tjerë u plagosën të shtunën në një atentat vetëvrasës i marrë përsipër nga talebanët në lindje të Afganistanit.
Tërheqja e trupave nga Afganistani, që është edhe një premtim elektoral i Hollande, pritet të nisë në korrik dhe të përfundojë në fund të 2012, gati 1 vit nga data që kishte deklaruar më parë paraardhësi i tij Sarkozi. Franca, është një nga 5 shtetet që kontribuon me një numër të madh ushtarësh në trupat e ISAF, me 3300 ushtarë dhe vdekja e 4 ushtarëve ditën e djeshme e çon në 87 numrin e ushtarëve francezë të vdekur në Afganistan që në 2001.
Trupat franceze pritet të lënë Afganistanin 2 vjet para tërheqjes së NATO-s, ndërkohë që dhuna është rritur shumë javët e fundit, teksa talebanët po vënë në shënjestër forcat afgane dhe 130 mijë trupat e huaja në vend. Edhe Shqipëria kontribuon me trupat e saj në misionin paqëruajtës që NATO ka ndërmarrë në Afganistan, ku në shkurt të 2012, humbi jetën kapiteni Feti Vogli.
