Ekspertët e dominimit, pjesëtarë të Forcës së Sigurisë së Kosovës, me uniforma mbrojtëse dhe helmeta, pas shkrirjes së borës, kanë vazhduar të enjten punën në procesin e ngadalshëm të largimit të minave në Kosovë, ku kanë mbetur shumë bomba dhe mina të ushtrisë së Serbisë, të vendosura gjatë luftës së vitit 1998-1999.
Behxhet Kodra, nga Forca e Sigurisë së Kosovës, ka thënë se disa pjesë të territorit të Kosovës mbeten akoma të rrezikshme me bomba dhe mina tokësore. Ekipi i tij punon në malet rreth fshatit Harilaq, 30 kilometra në perëndim të kryeqytetit Prishtina dhe afër aeroportit kryesor të Kosovës.
“Ne kemi punuar në këtë lokacion gjatë dy viteve të kaluara dhe kemi gjetur dhe shkatërruar 200 pajisje eksploduese nga bombat, predhat, raketat dhe projektilët e tjerë”, ka thënë Kodra për Radion Evropa e Lirë, duke mos harruar të shtojë edhe proverbin “një minë e larguar, një jetë e shpëtuar”.
Prej se ka përfunduar lufta, nga këto mina të fshehura, janë vrarë 114 vetë dhe janë plagosur më se 450 vetë. Në vitin 1999 ishin regjistruar afro 4500 vende me mina, pas fushatës 78 ditëshe të bombardimeve të NATO-s, me të cilën përfundoi lufta dhe u ndal goditja brutale e forcave të Serbisë kundër shqiptarëve në Kosovë.
