Autoritetet izraelite kanë vendosur të rrënojnë plotësisht një fshat palestinez në jug të Bregut Perëndimor dhe për të dëbuar banorët e tij me pretendimet se ka vendbanime të ndërtuara pa leje, raporton Anadolu Agency (AA).
Kjo është konfirmuar për Anadolu Agency, nga aktivisti për mbrojtjen e të drejtave të palestinezëve, Rateb al-Jabour. “Një gjykatë izraelite ka lëshuar një urdhër për rrënimin e fshatit Susya dhe për të zhvendosur banorët e tij me pretendimin se fshati është ndërtuar në mënyrë të paligjshme në një vend që është nën kontrollin e Izraelit”- deklaroi Rateb al-Jabour për AA. Aktivisti në fjalë ka pretenduar se fshati është ndërtuar dhe populluar edhe para pushtimit izraelit të Bregut Perëndimor në vitin 1967.
Fshati është i populluar nga 350 palestinezëve, dhe kryesisht ata merren në jetën e përditshme me bujqësi dhe blegtori. Aktivisti shtoi se vendimi për shkatërrimin e fshatit në fjalë është marrë me qëllim të zgjerimit të vendbanimeve hebreje në atë zonë. Ndërkohë që në lidhje me pretendimet e Al-Jabour autoritetet izraelite nuk kanë bërë komente.
