Gjithkush e di që duhani është i dëmshëm dhe i ndaluar. Dhe gjithkush e di që ai është tejet më i dëmshëm për gratë shtatzëna, por ndodh shpesh herë që gratë edhe pse në muajin e nëntë, dhe pas kohës së lindjes vijojnë ta pinë atë.
Një studim i kryer nga Dr Nadja Reissland, në Universitetin e Durhamit dhe Lancaster, ndihmon për të kuptuar se si dhe çfarë mund të dëmtojë duhani tek fetusi.
Studiuesja ka përdorur vëzhgimet speciale për të kapur imazhe katër-dimensionale të fetusit tek femrat duhanpirëse ose jo. Rreth 20 nëna u morën në shqyrtim, katër prej të cilave pinin një mesatare prej 14 cigare në ditë. Fetuset u monitoruan dhe u “fotografuan” në javën e 24, 28, 32 dhe 36 të shtatzënisë.
Dr. Nadja Reissland arriti të studionte lëvizjen e fëmijëve në barkun e nënës në skaner 4D dhe vuri re ndryshimin e dukshëm. Reissland, e cila udhëhoqi studimet ka raportuar për revistën “Acta Paediatrica” se në të shumtën e rasteve fëmijët prekin gojën e tyre apo fytyrën kur ndjejnë një shqetësim të jashtëm e kjo ndodh edhe kur në trup futet duhan.
Gjithashtu studimi ka nënvizuar se fëmija mund të lindë me probleme zhvillimi në sistemin nervor qëndror, kur nëna konsumon duhan gjatë shtatzënisë.
