Përfaqësuesi i Lartë për Politikë të Jashtme dhe Siguri i Bashkimit Evropian, Josep Borrell tha të mërkurën se BE-ja duhet të përgatitet për përkeqësim të marrëdhënieve me Rusinë.
Tensionet mes bllokut evropian dhe Moskës janë në rritje për shkak të situatës në Ukrainë, burgosjes dhe shëndetit të kritikut të Kremlinit, Alexei Navalny po edhe disa skandaleve të spiunimit.
“Edhe njëher, marrëdhëniet tona me Rusinë janë në një pikë të ulët”, tha Borrell.
“Le të jetë e qartë se ne nuk duam të ushqejmë një dinamikë të përshkallëzimit. Por, megjithatë ne po tregojmë se nuk do të pranojmë taktika frikësuese dhe se duhet t’u përgjigjemi atyre nëse ato ndodhin”, tha Borrell.
“Unë mendoj se duhet të jemi të përgatitur për një periudhë të gjatë, të vështirë në marrëdhëniet tona me Rusinë”, paralajmëroi ai.
Tensionet janë ulur pak pasi Rusia tha se po tërhiqte forcat e vendosura pranë kufirit ukrainas për stërvitje dhe transferoi kritikun e Kremlinit në një spital.
Por, një akuzë e Çekisë se inteligjenca ruse qëndronte prapa një shpërthimi vdekjeprurës të vitit 2014 në territorin çek përshkallëzoi raportet diplomatike mes dy vendeve.
Çekia është vend anëtar i BE-së.
Praga dëboi disa diplomatë rusë duke nxitur hakmarrjen e Moskës me dëbimin e diplomatëve çekë.
Në shenjë solidariteti, disa anëtarë të NATO-s dhe BE-së kanë dëbuar diplomatët rusë gjithashtu për pretendime spiunimi.
Ndërkohë autoritetet bullgare kanë nisur një hetim ndaj gjashtë shtetasve rusë të dyshuar për përfshirje në një seri shpërthimesh që goditën katër depo armësh dhe pajisje armatimi në Bullgari midis 2011 dhe 2020.
Zëdhënësja e Prokurorit të Përgjithshëm bullgar, Siika Mileva, tha se ekziston një “supozim i arsyeshëm” se këto incidente janë të lidhura me helmimin gati fatal të tregtarit bullgar të armëve Emilian Gebrev më 2015-të dhe një shpërthim në një depo çeke municionesh më 2014.
