Themeluesi i Frontit Kombëtar në Francë, Jean-Marie Le Pen, e ka kritikuar lideren aktuale të kësaj partie, Marine Le Pen, që është vajza e tij, pasi ajo e suspendoi atë nga anëtarësia në këtë parti të së djathtës ekstreme.
Gjatë një interviste në Radion Franceze, Le Pen, 86 vjeçar, tha se do të ishte “skandaloze” nëse vajza e tij, Marine Le Pen, zgjedhet presidente e Francës.
Suspendimi i zotit Le Pen nga partia është shpallur dje, pasi ai kishte bërë komente se dhomat naziste të gazit gjatë Holokaustit në Luftën e Dytë Botërore, ishin thjesht gjëra të parëndësishme.
Marine Le Pen po përpiqet ta distancoj vetveten dhe partinë nga imazhi racist dhe antisemit, pasi përgatitet për tu kandiduar në zgjedhjet e ardhshme presidenciale në Francë.
Babai i saj tha sot se suspendimi i tij dhe rreziku që ta humbë titullin e kryetarit të nderit të partisë, paraqet “tradhti” dhe ai tash nuk dëshiron që ta shoh fitoren eventuale të vajzës së tij në zgjedhjet presidenciale të vitit 2017.
