Policia në Ferizaj ka arrestuar të martën në mbrëmje, B. Rr. 20-vjeçar, i dyshuar për veprën penale “të detyrimit dhe shantazhit”. Duke e shantazhuar me publikimin e një videoje, ai e kishte detyruar viktimën t’ia jepte 6 000 euro. Por, është kapur në flagrancë nga policia.
Pas një plani të detajuar të Sektorit të Hetimeve të Policisë Rajonale në Ferizaj, të martën në orët e mbrëmjes është arrestuar: B. Rr., 20 vjeç, i dyshuar për veprën penale “të detyrimit dhe shantazhit”.
Agim Gashi, nga Zyra Rajonale për Informim në Ferizaj, ka bërë të ditur se i dyshuari, fillimisht e ka kërcënuar përmes telefonit viktimën, duke e shantazhuar dhe detyruar që t’ia jepte 6 000 euro. “I dyshuari e kishte kërcënuar me publikimin e një videoje”, transmeton Gazeta JnK.
B. Rr. është arrestuar në flagrancë nga policia, në një lokal në Ferizaj, në kohën kur po i merrte paratë e kërkuara nga viktima.
“Paratë dhe video-incizimi janë konfiskuar nga policia dhe do të shërbejnë si prova materiale të këtij rasti”, njoftoi zëdhënësi Agim Gashi.
Me urdhër të prokurorit, ndaj të dyshuarit është shqiptuar masa e ndalimit policor për 48 orë, deri në kompletimin e rastit. /Telegrafi
