Ministri i Punëve të Jashtme, Enver Hoxhaj, ka emëruar ambasadorin e parë të Republikës së Kosovës në Itali, Albert Prenkaj, drejtor të Akademisë Diplomatike të Kosovës, me seli në Prizren.
Vendimi i ministrit Hoxhaj, pason vendimin e Qeverisë së Kosovës për themelimin e Akademisë dhe i hap rrugë funksionalizimit të shpejtë të Akademisë Diplomatike të Kosovës, si një institucion shumë i rëndësishëm për fuqizimin e shërbimit të jashtëm të Republikës së Kosovës.
Akademia Diplomatike e Kosovës si institucion publik do të merret me përgatitjen dhe formimin profesional të anëtarëve të personelit në shërbimin e jashtëm, duke u mbështetur në parimin se politika e jashtme moderne duhet të funksionojë duke u mbështetur në studim, hulumtim dhe ngritje të kapaciteteve permanente të stafit, thuhet në njoftimin e MPJ.
Akademia po ashtu do të hartojë dokumentet strategjike, relevante të politikës së jashtme, do të merret me trajnimin e diplomatëve të Kosovës, si dhe me organizimin e konferencave, forumeve, takimeve rajonale dhe seminareve për çështjet e politikës së jashtme si tërësi.
Akademia Diplomatike do të jetë një urë e fuqishme që do ta lidhë Kosovën me qendrat e mëdha të vendosjes politike.
Selia e saj do të jetë në Prizren, vendim i cili është marr nga Qeveria e Kosovës dhe është bërë publik në korrik nga ministri i Punëve të Jashtme i Kosovës, Enver Hoxhaj, gjatë një vizite zhvilluar në Prizren.
