Nebil Ebu Rudayne lidhur me një marrëveshje të mundshme të paqes me Izraelin tha se “nuk do të pranojnë që në territoret palestineze të mbetet asnjë ushtar i vetëm i Izraelit”
RAMALLAH (AA) – Zëdhënësi i Presidencës së Palestinës Nebil Ebu Rudayne lidhur me një marrëveshje të mundshme të paqes me Izraelin tha se “nuk do të pranojnë që në territoret palestineze të mbetet asnjë ushtar i vetëm i Izraelit”, raporton Anadolu Agency (AA).
Duke reguar për deklaratat e kryeministrit të Izraelit Binyamin Netanyahu se “edhe nëse do të ketë marrëveshje për paqe, Izraeli do të vazhdojë kontrollin ushtarak në Bregun Perëndimor”, Ebu Rudayne tha se “deklaratat e Netanyahut janë të papranueshme dhe kjo nuk do të çojë palët në një marrëveshje të paqes me legjitimitet ndërkombëtar”.
Ai tha se deklaratat e tilla “kanë për qëllim vazhdimin e konfliktit aktual” dhe se “Paqja dhe siguria mund të sigurohet vetëm me tërheqjen e Izraelit nga tokat palestineze, përfshirë edhe Jerusalemin Lindor, i cili ndodhet nën pushtimin e Izraelit që nga viti 1967”.
Sipas tij, “Qeveria palestineze nuk do të pranojë që në territoret e Palestinës së pavarur të mbetet asnjë ushtar i vetëm i Izraelit”. Ebu Rudayne tha se një kërkesë e tillë e Netanyahut është “një parakusht i papranueshëm dhe se ka treguar joseriozitetin e Izraelit në përpjekjet e SHBA-ve për ta siguruar paqen”.
Netanyahu dje në një deklaratë për radion ushtarake të Izraelit tha se edhe në qoftë se në të ardhmen do të arrihet një marrëveshje e paqes me palën palestineze, Izraeli do të vazhdojë kontrollin e tij ushtarak në Bregun Perëndimor.
Izraeli që nga viti 1967 mban nën pushtim Jerusalemin Lindor ku ndodhet edhe Mesxhid-i Aksa-ja dhe Bregun Perëndimor. Në Jerusalemin Lindor janë rreth 200 mijë, kurse në Bregun Perëndimor dy herë më shumë kolonë hebrenj. Të gjitha vendbanimet e reja hebreje të ndërtuara në atë zonë, sipas normave ndërkombëtare janë të paligjshme.
Mes Bregut Perëndimor dhe Jerusalemit, Izraeli ka ndërtuar një “mur ndarës”, me të cilin pengon ardhjen e palestinezëve në Jerusalem. Paralelisht me këtë, Izraeli që nga viti 2006 mban nën embargo edhe Gazën.
