Më shumë se 10 mijë libianë u bashkuan të mërkurën për të shoqëruar në banesën e fundit një prej kryengritësve, pjesëmarrës në kapjen dhe ekzekutimin e ish-diktatorit, Muammar Gaddafi, një vit më parë.
Omran Ben Shaaban ndërroi jetë ditën e martë, pasi u mor peng, u torturua dhe u qëllua nga persona të cilët besohet se ishin mbështetës të kolonelit.
Trupi i pajetë i 22-vjeçarit mbërriti të mërkurën në qytetin e lindjes, në Misrata, ku kortezhi funebër u shndërrua në një manifestim të vërtetë popullor.
Me qindra, lëshuan slogane dhe kërkuan nga qeveria që të hakmerret për vdekjen e tij.
Shaaban fitoi një famë të menjëhershme në vendin me 6,5 milionë banorë të Afrikës Veriore, kur përfundoi në faqet e para të gazetave në datën 20 tetor, duke nxjerrë nga një kanal diktatorin Gaddafi, në përfundimin e betejës vendimtare, në qytetin e Sirtes.
Ai ishte prezent në momentin kur koloneli u qëllua me një plumb në kokë disa orë pas kapjes dhe konsiderohej si një prej të dyshuarve kryesorë të vrasjes./tch
