Një dokumentar dhe dosje të publikuara së fundmi nga Departamenti i Drejtësisë i SHBA-së kanë hedhur dritë mbi anën më pak të njohur të Jeffrey Epstein: edukimin e tij të fortë hebraik dhe lidhjet e dyshuara me shërbimin sekret izraelit.

Sipas një memorandumi të FBI-së të vitit 2020, burime konfidenciale sugjerojnë se Epstein nuk ishte thjesht një financier i korruptuar, por një “agjent i kooptuar”, që operonte nën drejtimin e figurave të larta të shtetit izraelit.

Dosjet zbulojnë se Epstein kishte një miqësi dhjetëvjeçare me ish-kryeministrin e Izraelit, Ehud Barak. Ky i fundit, një ish-drejtues i inteligjencës ushtarake, e kishte vizituar shtëpinë e Epstein në Nju Jork më shumë se 30 herë midis viteve 2013-2017.

Pretendimet shkojnë më tej, duke sugjeruar se avokati i tij, Alan Dershowitz, u kishte thënë prokurorëve federalë se Epstein “i përkiste inteligjencës”, gjë që mund të shpjegojë marrëveshjen e tij jashtëzakonisht të favorshme me drejtësinë në vitin 2008.

Në qendër të këtyre zbulimeve është një “libër homazh” prej 238 faqesh, i përgatitur nga Ghislaine Maxwell për 50-vjetorin e Epstein. Libri dokumenton origjinën e tij në Sea Gate, një komunitet hebre në Brooklyn, dhe udhëtimet familjare në Izrael në vitin 1985.

Dokumenti përmban ndër të tjera letra dhe mesazhe nga figura mjaft me ndikim si miliarderi Leslie Wexner, Mort Zuckerman dhe Leon Black. Ky i fundit, një donator i madh i kauzave sioniste, i kishte paguar Epstein-it mbi 150 milionë dollarë. Lidhja me Leslie Wexner, pronarin e “Victoria’s Secret”, i dha Epstein-it një pushtet të pakufizuar financiar dhe qasje te modelet e reja, duke u hequr si rekrutues për markën.

Ndërsa ai shfaqej si një filantrop dhe mik i të fuqishmëve, prapaskenat tregojnë një rrjet të ndërlikuar ku ndërthureshin ndikimi politik, spiunazhi dhe abuzimi seksual. Sot, këto dosje nxitin pyetje të rënda mbi shkallën e vërtetë të depërtimit të inteligjencës së huaj në rrethet më të larta të pushtetit në SHBA nëpërmjet figurës së tij./tesheshi. com/