Pavarësisht thirrjeve të vendeve të perëndimit, Rusia po vazhdon ta shtoj praninë luftarake në Detin e Zi mes thellimit të tensioneve me Ukrainën. Njoftohet se dy anije luftarake ruse kaluan ngushticën e Bosforit për të shkuar në Detin e Zi ndërkohë që 15 anije më të vogla u vendosën në det ndërsa Moska shton prezencën e saj detare në një kohë thellimi tensionesh me Perëndimin dhe Ukrainën. Përveç kësaj, Rusia ka kufizuar përkohësisht lëvizjen e anijeve të huaja luftarake “dhe anijeve të tjera shtetërore” pranë Krimesë, të cilën e aneksoi nga Ukraina në vitin 2014, një veprim i dënuar nga Kievi dhe Uashingtoni. Shenjë tjetër e thellimit të tensioneve në rajon ishte edhe një anije me kamionë logjistikë dhe pajisje për forcat e NATO-s në Rumani që kaloi Bosforin, sipas të njëjtit gazetar të agjencisë së lajmeve Reuters.
