Qeveria spanjolle ka vendosur të tërheqë ambasadoren e saj në Izrael, sipas gazetës zyrtare të shtetit

Ky veprim i së mërkurës vjen në një kohë kur Spanja ka qenë një nga kritikët më të zëshëm të Bashkimit Evropian ndaj luftës gjenocidale të Izraelit në Gaza dhe luftës së re kundër Iranit, të nisur nga Shtetet e Bashkuara dhe Izraeli.
“Me propozimin e Ministrit për Punë të Jashtme, Bashkim Evropian dhe Bashkëpunim, dhe pas shqyrtimit nga Këshilli i Ministrave në mbledhjen e tij të datës 10 mars 2026, unë urdhëroj përfundimin e emërimit të zonjës Ana María Sálomon Pérez si Ambasadore e Spanjës në Shtetin e Izraelit,” thuhet në gazetën zyrtare.
Ambasada e Spanjës në Tel Aviv do të drejtohet nga një i ngarkuar me punë (charge d’affaires), tha një burim në Ministrinë e Jashtme, sipas agjencisë së lajmeve Reuters.
Kryeministri i vendit, Pedro Sanchez, është një nga të paktët liderë të majtë në Evropë që e ka dënuar sulmin SHBA-Izrael ndaj Iranit si “të pajustifikueshëm” dhe ka deklaruar se qëndrimi i Madridit është “jo luftës”.
Qeveria e Sanchez ka qenë gjithashtu një nga të paktat kombe evropiane që ka dënuar në mënyrë të vazhdueshme veprimet e Izraelit në Gaza. Në tetor, parlamenti i Spanjës miratoi sanksionimin me ligj të një embargoje totale të armëve ndaj Izraelit, duke ndaluar përgjithmonë shitjen e armëve, teknologjisë me përdorim të dyfishtë dhe pajisjeve ushtarake, si përgjigje ndaj gjenocidit.