Fluturim humanitar nga Jordania drejt Spanjës me fëmijë gazanë të sëmurë rëndë
Një aeroplan transporti ushtarak spanjoll A400, i pajisur me pajisje mjekësore, do të transportojë 13 fëmijë të sëmurë rëndë nga Gaza e shkatërruar nga lufta, së bashku me familjet e tyre, nga Jordania për trajtim në Spanjë të mërkurën, më 30 korrik. Informacioni u konfirmua nga ministrja spanjolle e Mbrojtjes Margarita Robles.
“Qëllimi është të sigurohet që këta fëmijë të marrin kujdes të përshtatshëm mjekësor që aktualisht nuk mund ta kenë në kushtet në të cilat jetojnë“, tha Robles.
Kjo nuk është hera e parë që Spanja u ka ofruar ndihmë mjekësore civilëve palestinezë. Që nga fillimi i ofensivës izraelite në Gaza, e nisur pas sulmit të Hamasit më 7 tetor 2023, Spanja ka pranuar tashmë disa fëmijë të plagosur dhe të sëmurë rëndë për trajtim.
Ministrja Robles dënoi edhe një herë brutalitetin e konfliktit, duke theksuar qëndrimin e fortë të vendit të saj ndaj veprimit ushtarak izraelit.
“Situata në Gaza është absolutisht e tmerrshme. Mizoria e treguar nga kryeministri Netanyahu është e papranueshme. Unë besoj se bashkësia ndërkombëtare duhet të reagojë urgjentisht,” tha ajo.
Përveç ndihmës mjekësore, qeveria spanjolle ka njoftuar një dërgesë të re ndihme humanitare – 12 ton ushqime që do të hidhen nga ajri mbi Gaza. Kjo vjen pas një operacioni të ngjashëm në mars 2024, kur u dorëzuan 26 ton ndihma, në një përpjekje për të lehtësuar katastrofën humanitare në Rripin e Gazës, ku qindra mijëra njerëz po përballen me urinë. /tesheshi.com/
