Katërmbëdhjetë anëtare të Këshillit të Sigurimit të OKB-së dënuan ashpër “përdorimin e urisë si armë lufte”, për të cilën thanë se “është qartësisht e ndaluar nga e drejta ndërkombëtare humanitare”.
Shtetet e Bashkuara të Amerikës (ShBA) të mërkurën ishin i vetmi shtet në Këshillin e Sigurimit të OKB-së që refuzoi të pranonte se uria në rritje në Rripin e Gazës është një “krizë e shkaktuar nga veprimet e njeriut”.
Në total, 14 anëtare të Këshillit e dënuan ashpër “përdorimin e urisë si armë lufte”, duke theksuar se është “qartësisht e ndaluar nga e drejta ndërkombëtare humanitare”. Ato bënë thirrje për një “armëpushim të menjëhershëm, të pakushtëzuar dhe të përhershëm”, lirimin e të gjithë pengjeve që kanë mbetur në Gaza dhe rritjen e ndihmës humanitare.
ShBA-ja ishte i vetmi anëtar që u përmbajt nga nënshkrimi i deklaratës, ku theksohej se Izraeli duhet “menjëherë dhe pa kushte të heqë të gjitha kufizimet për shpërndarjen e ndihmës” dhe i bëhej thirrje të “anulonte menjëherë vendimin për zgjerimin e mëtejshëm të operacionit ushtarak në Gaza me synim marrjen e qytetit të Gazës”.
Këshilli u mblodh për të diskutuar katastrofën humanitare në Gaza, ndërsa zyrtarë të OKB-së dhe përfaqësues humanitarë paralajmëruan se uria po përhapet në territorin e rrethuar.
“Uria në Gaza është këtu, një uri e inskenuar, e planifikuar, artificialisht e shkaktuar”, tha Inga Ashing, drejtoreshë ekzekutive e organizatës Save the Children. “Teksa flasim, fëmijët në Gaza po vdesin sistematikisht nga uria. Kjo është një politikë e qëllimshme. Ky është përdorimi i urisë si metodë lufte në formën më të keqe.”
Ashing tha se klinikat e kësaj organizate jofitimprurëse në Gaza janë të mbushura me fëmijë të varfër, aq të kequshqyer sa “nuk kanë fuqi të flasin apo edhe të qajnë nga agonia. Ata shtrihen atje të dobësuar, duke u shuar para syve.”
Joyce Msuya, ndihmëssekretare e përgjithshme për çështjet humanitare, u tha anëtarëve të Këshillit se më shumë se gjysmë milioni palestinezë në Gaza po përballen me “uri, varfëri dhe vdekje”, që përbën rreth një të katërtën e popullsisë. Ky numër mund të rritet në mbi 640.000 deri në fund të shtatorit.
