Të martën, Presidenti i Shteteve të Bashkuara Donald Trump akuzoi homologun e tij rus Vladimir Putin se po fliste “budallallëqe” për Ukrainën dhe njoftoi se Shtetet e Bashkuara do të dërgonin armë shtesë në Kiev në mënyrë që të mund të mbrohej.

Shprehja e Trump-it pasqyron qartë zhgënjimin e tij në rritje me presidentin rus për shkak të luftës që Moska filloi gati tre vjet e gjysmë më parë.

“Po marrim shumë budallallëqe nga Putini, nëse doni të dini të vërtetën,” u tha Trump gazetarëve gjatë një takimi të kabinetit të transmetuar në televizion në Shtëpinë e Bardhë. “Ai është gjithmonë shumë i sjellshëm, por në fund rezulton se kjo nuk do të thotë asgjë.”

Trump përsëriti se është “shumë i pakënaqur” me Putinin, sepse telefonata e tyre javën e kaluar nuk solli asnjë përparim në lidhje me marrëveshjen e paqes për Ukrainën, për të cilën ai ka këmbëngulur që kur u kthye në pushtet.

I pyetur nga gazetarët në lidhje me qëndrimin e tij mbi projektligjin e Senatit për sanksionet e reja kundër Rusisë, Trump u përgjigj: “Po e shqyrtoj seriozisht.”

Kritika e Trump ndaj Putinit erdhi një ditë pasi ai njoftoi se SHBA-të do të dërgonin armë shtesë në Ukrainë, një ndryshim nga njoftimi i Uashingtonit javën e kaluar se do të pezullonte përkohësisht dërgesat e disa ndihmave ushtarake.

Presidenti amerikan, i cili ka alarmuar Kievin dhe aleatët perëndimorë duke zbutur papritur retorikën e tij ndaj Putinit që nga kthimi në Shtëpinë e Bardhë, e përsëriti këtë vendim të martën.

“Putini nuk po i trajton njerëzit drejt. Ai po vret shumë njerëz. Kjo është arsyeja pse po dërgojmë armë mbrojtëse dhe unë e autorizova këtë“, tha Trump.

Sipas portalit amerikan Axios, Trump premtoi të dërgojë menjëherë dhjetë interceptorë Patriot – sisteme mbrojtëse nga raketat – në Ukrainë.

Ai gjithashtu i bëri thirrje Sekretarit të Mbrojtjes Pete Hegseth të ushtrojë presion mbi prodhuesit e armëve për të rritur prodhimin.

“Ne duhet t’i shpejtojmë ato, Pete, dhe t’i lejojmë t’i prodhojnë ato me një ritëm shumë më të shpejtë”, tha Trump. /tesheshi.com/