Ministri për Evropën dhe Punët e Jashtme të Shqipërisë, Ditmir Bushati, realizoi një vizitë në Emiratet e Bashkuara Arabe (EBA) me ftesë të homologut të tij, Sheiku Abdullah bin Zayed al-Nahyan…
Ministri për Evropën dhe Punët e Jashtme të Shqipërisë, Ditmir Bushati, realizoi një vizitë në Emiratet e Bashkuara Arabe (EBA) me ftesë të homologut të tij, Sheiku Abdullah bin Zayed al-Nahyan.
Sipas një njoftimi nga Ministria për Evropën dhe Punët e Jashtme të Shqipërisë, Ditmir Bushati ndoqi punimet e Forumit Sir Bani Yas në EBA, një platformë e diskutimit politik që trajton çështjet dhe sfidat me të cilat përballet Lindja e Mesme dhe impakti i tyre në arkitekturën evropiane të sigurisë.
Gjatë punimeve të këtij forumi, ministri Bushati zhvilloi një takim me ministrin e Punëve të Jashtme të EBA-s, Abdullah bin Zayed al-Nahyan.
“Të dy ministrat vlerësuan nivelin e marrëdhënieve mes dy vendeve duke vënë theksin në bashkëpunimin ekonomik dhe financimin e projekteve infrastrukturore në Shqipëri nga Emiratet. Në këtë kuadër, ministri Bushati kërkoi mbështetje për financimin e projektit për zgjatimin e bulevardit të ri të Tiranës”, thuhet në njoftim.
Në fund të takimit, dy homologët nënshkruan memorandumin e mirëkuptimit për konsultime politike midis Ministrisë për Evropën dhe Punët e Jashtme të Republikës së Shqipërisë dhe Ministrisë së Jashtme të Emirateve të Bashkuara Arabe. / AA
