Mbështetja për Palestinën është bërë një nga pamjet më karakteristike në botërorin e këtij viti në futboll.
Tifozë nga e gjithë bota kanë shfrytëzuar turneun më të madh të futbollit për të shpalosur flamuj palestinezë, për të brohoritur slogane në mbështetje të Palestinës dhe për të bërë thirrje për veprim lidhur me luftën në Gaza.
Gjatë gjithë turneut, që zhvillohet në Shtetet e Bashkuara, Kanada dhe Meksikë, protesta janë organizuar si brenda stadiumeve ashtu edhe në zonat publike të grumbullimit të tifozëve përpara ndeshjeve.
Mbështetësit e skuadrave pjesëmarrëse kanë shndërruar fan zonat dhe tribunat në skena të shprehjes politike.
Flamujt palestinezë janë shfaqur pothuajse në çdo fazë të turneut, ndërsa tifozët kanë bërë vazhdimisht thirrje për lirinë e Palestinës dhe janë bashkuar me fushatën globale “Show Israel the Red Card” (Tregoji Izraelit kartonin e kuq), e cila u kërkon autoriteteve të futbollit të ndërmarrin masa ndaj Izraelit për shkak të luftës në Gaza.
Mbështetja për Palestinën ishte e dukshme edhe gjatë fitores 3-2 të Turqisë ndaj Shteteve të Bashkuara në ndeshjen e fundit të Grupit D.
Një tifoz turk qëndroi pas njërës prej portave duke valëvitur një flamur të madh palestinez gjatë gjithë ndeshjes. Kamerat televizive e fokusuan disa herë gjatë transmetimit të drejtpërdrejtë.
Edhe tifozët e Marokut kanë qenë vazhdimisht ndër përkrahësit më të zëshëm të Palestinës gjatë turneut.
Përpara barazimit të Marokut me Brazilin në ndeshjen hapëse të Grupit C, qindra tifozë u mblodhën në sheshin Times Square të Nju Jorkut, duke valëvitur flamuj palestinezë dhe duke brohoritur “Palestina e lirë”, përpara se të marshonin drejt stadiumit.
Brenda stadiumit New York New Jersey, ku do të zhvillohet finalja e Kupës së Botës, tifozët marokenë shpalosën sërish flamuj palestinezë pas njërës prej portave dhe vazhduan demonstrimin gjatë gjithë ndeshjes.
Të njëjtat skena u përsëritën edhe në përballjen e Marokut me Holandën në fazën e 1/16-ave. Edhe tifozët e Bosnjës dhe Hercegovinës shfaqën flamuj palestinezë gjatë ndeshjes kundër Zvicrës në Los Anxhelos.
Mes pankartave në tribuna ishte edhe një me mbishkrimin: “Mbështetje për Palestinën nga Sarajeva”. Shumë tifozë boshnjakë bënë krahasime mes përvojës së vendit të tyre gjatë Luftës së Bosnjës (1992-1995) dhe vuajtjeve të palestinezëve, duke e bërë protestën e tyre një nga shfaqjet më simbolike të solidaritetit gjatë turneut.
Mbështetja për Palestinën vazhdoi edhe gjatë ndeshjes Bosnjë dhe Hercegovinë–Katar.
Një tifoz nga Katari, i veshur me kefijen tradicionale palestineze dhe me fytyrën të lyer me ngjyra, valëviti flamuj palestinezë gjatë gjithë ndeshjes, duke iu shtuar numrit në rritje të shfaqjeve të solidaritetit në turne.
Një flamur palestinez ishte gjithashtu i dukshëm përpara fitores së Francës ndaj Senegalit në ndeshjen hapëse të Grupit I. Përpara ndeshjes së Brazilit kundër Japonisë në fazën e 1/16-ave, mijëra tifozë brazilianë marshuan drejt stadiumit.
Mes tyre, një tifoz mbante një flamur palestinez gjatë marshimit. Flamuj palestinezë u panë gjithashtu edhe brenda stadiumit gjatë ndeshjes mes dy skuadrave të Lindjes së Mesme. Shprehjet e solidaritetit me Palestinën kanë ardhur nga tifozë që përfaqësojnë vende nga Evropa, Afrika dhe Azia.
Tifozë nga Turqia, Spanja, Skocia, Bosnja dhe Hercegovina, Maroku, Senegali, Algjeria, Egjipti, Irani dhe disa vende të tjera kanë shpalosur flamuj palestinezë ose kanë shprehur mbështetje gjatë ndeshjeve dhe aktiviteteve të tifozëve përgjatë turneut. \tesheshi.com\
