Numri më i ri i revistës “Dituria Islame”, e cili doli nga shtypi në muajin e bekuar të Ramazanit, iu prezantua qytetarëve të komunës së Malishevës.
Aktivistja Mihana Goga- Bekteshi takoi qytetarë të shumtë, përfaqësues të bizneseve, me të cilët diskutoi rreth temave që shtjellohen në këtë revistë, e në veçanti për numrin e fundit.
“Qytetarët e Malishevës ishin jashtëzakonisht mikëpritës dhe shumë të interesuar për temat fetare, edukative që përmbanë revista ‘Dituria Islame'”. Ata nuk ngurruan për të bërë pyetje të shumta dhe për të diskutuar gjerësisht tema të ndryshme. Aroma e muajit të Ramazanit ndihej në këtë qytezë plotë gjallëri”, tha mes tjerash Goga- Bekteshi.
Përmes artikujve të shumtë për Ramazanin, në këtë numër lexuesit mund të kuptojnë më shumë rreth dispozitave të agjërimit, për ripërtëritjen e besimit dhe raporteve ndërnjerëzore në Ramazan, kategoritë e ngarkuara me agjërim dhe rastet që e justifikojnë mosmbajtjen e agjërimit, për dispozitat e agjërimit të shtatzënës dhe gjidhënëses dhe mënyra e kompensimit të tij, e tema të tjera me rëndësi.
Ndonëse kjo revistë çdo muaj arrinë në të gjithë teritorin e Kosovës përmes Këshillave të Bashkësisë Islame, aktiviteti në fjalë synon që përmes takimeve me qytetarë të shumtë të ritheksoi vlerën e fjalës së shkruar duke iu prezantuar artikuj të fushave të ndryshme, nga të cilat mund të përfitoj secili njeri.
Kujtojmë që numri i parë i revistës “Dituria Islame” doli në vitin 1986, e cila krahas “Edukatës Islame” dhe “Takvimit” u bë revista më e fuqishëm për kultivimin, shpjegimin, mësimin dhe interpretimin e fesë islame ndër shqiptarët në Kosovë dhe jo vetëm.
