Bashkësia Islame në bashkëpunim me Ministrinë e Mirëqenies Sociale dhe Agjencinë e regjistrimit civil, kanë arritur marrëveshje për evidentimin e vdekjeve që tash e tutje do t’i bëj Bashkësia Islame.
Sekretari i BIK-ut, Resul Rexhepi tha se Bashkësia Islame çdo herë ka qenë e gatshme t’i ndihmoj shtetit dhe tani çdo banor që varroset nga BIK-u nëpër komuna, të njëjtat regjistra do të përdoren edhe nga Ministria e Mirëqenies Sociale.
Izedin Bytyqi, sekretari i Ministrisë së Mirëqenies Sociale, tha se ky proces i ka dy të mira – fillimisht bëhet menaxhimi më efikas i buxhetit pasi që më herët nuk janë lajmëruar vdekjet e pensionet kanë vazhduar, dhe e dyta kjo marrëveshje sjell mirëqenie për qytetarët.
Ai më tutje tha se shumë shpejt do të bëhet edhe një marrëveshje tjetër me bashkësitë e tjera fetare.
Ndërsa Lulzim Ejupi, drejtori i Agjencisë së regjistrimit civil vlerësoi lartë këtë marrëveshje mes palëve sepse do të evidentohet në mënyrë të saktë çdo vdekje.
