Më shumë se 136.200 palestinezë janë plagosur në sulmet izraelite që nga tetori 2023, tha Ministria e Shëndetësisë.
Të paktën 57.418 palestinezë janë vrarë në luftën gjenocidale të Izraelit në Rripin e Gazës që nga tetori i vitit 2023, tha sot Ministria e Shëndetësisë, transmeton Anadolu.
Në një deklaratë, Ministria tha se 80 trupa u sollën në spitale në 24 orët e fundit, ndërsa 304 persona u plagosën, duke e çuar numrin përgjithshëm të të plagosurve në 136.261.
“Shumë viktima janë ende të bllokuara nën rrënoja dhe në rrugë pasi ekipet e shpëtimit nuk janë në gjendje t’i arrijnë”, shtoi ajo.
Ministria gjithashtu vuri në dukje se tetë palestinezë u vranë dhe mbi 40 u plagosën ndërsa po përpiqeshin të merrnin ndihmë humanitare në 24 orët e fundit, duke e çuar numrin total të palestinezëve të vrarë duke kërkuar ndihmë në 751, me mbi 4.931 të tjerë të plagosur që nga 27 maji.
Më herët, burimet lokale njoftuan për të paktën 41 të vrarë nga sulmet izraelite që nga orët e para të së dielës.
Ushtria izraelite rifilloi sulmet e saj në Rripin e Gazës më 18 mars dhe që atëherë ka vrarë 6.860 persona dhe ka plagosur 24.220 të tjerë, duke prishur një armëpushim dhe marrëveshje shkëmbimi të të burgosurve që hyri në fuqi në janar.
Nëntorin e kaluar, Gjykata Ndërkombëtare Penale lëshoi urdhra arresti për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
Izraeli përballet gjithashtu me një padi për gjenocid në Gjykatën Ndërkombëtare të Drejtësisë për luftën e tij në enklavën palestineze.
/Aa/
