Disa republikanë iu bashkuan demokratëve në nismën që kufizon kompetencat e presidentit për të nisur luftëra
Kongresi i SHBA-së miratoi të mërkurën një rezolutë mbi fuqitë e luftës që do të ndalonte veprimin ushtarak të SHBA-së kundër Iranit, duke e sfiduar presidentin Donald Trumpin, ndërsa një grusht republikanësh u bashkuan me demokratët për t’i dhënë fund luftës tremujore që e ka tronditur politikën brenda dhe jashtë vendit.
Kreu i Dhomës së Përfaqësuesve, Mike Johnson, ishte përpjekur të parandalonte një rezultat që do të tregonte kundërshtimin në rritje ndaj luftës, duke e mbyllur papritur seancën dy javë më parë kur rezoluta mbi fuqitë e luftës ishte në prag të miratimit.
Por pakënaqësia është rritur ndërsa konflikti zvarritet dhe Trump përpiqet të negociojë një zgjidhje të shpejtë. Votimi i së mërkurës ishte 215-208 dhe u prit me brohoritje në sallë. “Kjo luftë e pamatur, e kushtueshme dhe e zgjedhur prej Trump duhet të përfundojë sot”- tha udhëheqësi demokrat në Kongres, Hakeem Jeffries, kongresmen nga Nju Jorku.
“Gjithçka që na duhet janë një grusht republikanësh që të bashkohen me ne dhe ne mund ta përfundojmë këtë luftë që i ka kushtuar taksapaguesit amerikan mbi 100 miliardë dollarë”- shtoi ai.
Është hera e katërt që Dhoma e Përfaqësuesve është përpjekur të frenojë luftën e SHBA-së kundër Iranit dhe hera e parë që Kongresi arrin të miratojë këtë rezolutë. Senati miratoi rezolutën e vet për fuqitë e luftës muajin e kaluar, kur një grup senatorësh republikanë u shkëputën nga presidenti republikan, në një shfaqje të rrallë të kundërshtimit politik nga partia e tij.
Sa herë që demokratët e kanë shtyrë përpara rezolutën për fuqitë e luftës, numri i votave është rritur gradualisht, ndërsa është shtuar edhe shqetësimi politik mbi luftën e SHBA-së ndaj Iranit.
Trump kishte bërë fushatë për Shtëpinë e Bardhë me premtimin për t’i dhënë fund përfshirjes së SHBA-së jashtë vendit dhe për t’u përqendruar më shumë në çështjet e brendshme, por lufta e ka zhvendosur vëmendjen përsëri në Lindjen e Mesme.
Që kur SHBA-të iu bashkuan Izraelit në nisjen e sulmeve të 28 shkurtit ndaj Iranit, amerikanët kanë vuajtur rritjen e çmimeve të benzinës, duke shtuar presionin inflacionist mbi shpenzimet e konsumatorëve.
Irani ka qenë në gjendje të ndërpresë transportin detar përmes Ngushticës së Hormuzit, një kanal jetik për një segment të madh të naftës, gazit natyror dhe produkteve të lidhura me të, siç janë plehrat kimike.
Rezoluta e kompetencave të luftës nga Kongresi nuk do ta ndalonte menjëherë luftën, por do të ofronte një hap simbolik, në mos edhe ligjor, kundër veprimeve të mëtejshme ushtarake.
Tani ajo do të shkojë në Senat, ku katër senatorë republikanë muajin e kaluar iu bashkuan demokratëve në avancimin e një mase të ngjashme për të kufizuar fushatën amerikane kundër Iranit. Senati nuk ka marrë ende një votim përfundimtar për të miratuar ose hedhur poshtë rezolutën e vet të kompetencave të luftës.
Sekretari i Shtetit Marco Rubio paralajmëroi të mërkurën, duke dëshmuar në një seancë dëgjimore të Komitetit të Punëve të Jashtme të Dhomës së Përfaqësuesve, se nëse rezoluta kalon në Kongres, iranianët do të mendonin se “duart e administratës do të jenë të lidhura”
Ky nuk është i vetmi veprim që Kongresi po ndërmerr në arenën e sigurisë kombëtare, pasi demokratët, në pakicë, po punojnë për të dobësuar mbështetjen e republikanëve për masa përtej luftës kundër Iranit. Ata po përpiqen të forcojnë mbështetjen e SHBA-së për operacionet ushtarake të Ukrainës ndërsa ajo lufton me Rusinë, si dhe për të ndihmuar në rindërtimin e vendit të shkatërruar nga lufta.
Po këtë javë, Dhoma e Përfaqësuesve pritet të shqyrtojë një rezolutë për fuqitë e luftës për të bllokuar veprimin e SHBA-së në Liban. Sipas aktit të fuqive të luftës, Shtëpia e Bardhë ka një afat prej 60 ditësh për të kërkuar miratimin nga Kongresi për veprime ushtarake. \tesheshi.com\
