Dëshmitarët okularë thanë për Anadolu-n se dhjetëra kolonë izraelitë të shoqëruar nga forcat izraelite bastisën Huvaran dhe vandalizuan pronat palestineze, duke përfshirë djegien e disa shtëpive dhe makinave
Kolonët izraelitë organizuan sulm në qytezën Huvara pranë Nablusit në Bregun Perëndimor të pushtuar të dielën vonë, duke i vënë flakën disa shtëpive dhe makinave dhe duke plagosur dhjetëra palestinezë, raporton Anadolu.
Ministria palestineze e Shëndetësisë tha se një palestinez u plagos rëndë në kokë gjatë sulmit nga kolonët, të cilët ishin nën mbrojtje të fortë nga forcat izraelite.
Ndërkohë, Shoqëria Palestineze e Gjysmëhënës së Kuqe tha se 95 palestinezë pësuan thithje të gazit lotsjellës kur u përballën me ushtarët izraelitë.
Ajo gjithashtu shtoi se një palestinez u godit me thikë dhe një tjetër nga një copë metali dhe që të dy janë transferuar në spital.
Dëshmitarët okularë thanë për Anadolu-n se dhjetëra kolonë izraelitë të shoqëruar nga forcat izraelite bastisën Huvaran dhe vandalizuan pronat palestineze, duke përfshirë djegien e disa shtëpive dhe makinave në qytezë.
Sulmet e kolonëve erdhën pas vdekjes së dy kolonëve izraelitë në Huvara nga një palestinez i cili më pas u largua nga vendi i ngjarjes.
Në komentet e tij për sulmet e kolonëve, kryeministri izraelit Benjamin Netanyahu u bëri thirrje kolonëve që të mos hakmerren për vdekjen e dy kolonëve dhe t’ia lënë ushtrisë izraelite të kërkojë autorin.
“Lërini IDF-në (Forcat e Mbrojtjes së Izraelit) të përfundojnë ndjekjen e saj dhe mos e merrni ligjin në duart tuaja. Së bashku do ta mposhtim terrorizmin”, thuhet në deklaratën e Netanyahut.
Që nga fillimi i vitit, të paktën 60 palestinezë janë vrarë nga forcat izraelite gjatë bastisjeve në zonat palestineze në Bregun Perëndimor, duke përfshirë 11 të cilët u vranë të mërkurën gjatë një bastisjeje në qytetin e Nablusit.
/aa/
