Escobar: Koha për të testuar Vuçiçin përballë Kosovës
I dërguari i posaçëm i presidentit amerikan për Ballkanin Perëndimor, Gabriel Escobar, tha se Uashingtoni mbështet “Ballkanin e Hapur”, siç mbështet të gjitha iniciativat e tjera ekonomike, rajonale, por shtoi se është e rëndësishme që të bashkohen të gjashtë vendet.
“Rajoni do të jetë më i fortë, më dinamik nëse është i integruar. Vlerësimet janë se 22 milionë njerëz jetojnë në rajon dhe ai treg po zhvillohet tre herë më shpejt se pjesa tjetër e Evropës”, tha ai në një konferencë online të organizuar nga Aleanca Atlantike.
Ai ka thënë se ekzistojnë dy kushte për mbështetjen e nismës “Ballkani i Hapur”, transmeton Tanjug.
“Një është që të përfshihen të gjitha vendet e rajonit si anëtarë të plotë… Vullneti i (presidentit serb Aleksandar) Vuçiç për ta pranuar Kosovën anëtare të plotë duhet të testohet gjithashtu”, tha Escobar dhe vlerësoi se ky është një aspekt interesant i “Open Balkan”.
“Por ndryshimi midis zonës së lirë dhe zonës së kontrabandës është kontrolli kufitar,” shtoi ai dhe tha se “kjo do të thotë se kufiri i Serbisë me Republika Srpska dhe pjesën veriore e Kosovës duhet të shihen si kufij ndërkombëtarë”.
“Ballkani i hapur” në këto kushte, siç tha ai, është një mundësi e mirë për të “shëruar rajonin”.
I pyetur nëse ka afat që Serbia dhe Kosova të arrijnë një marrëveshje për normalizimin e marrëdhënieve, Escobar tha se do të ishte mirë që kjo të ndodhte “sa më shpejt”.
“Një konflikt i ngrirë nuk i shkon askujt”, tha diplomati amerikan, i cili foli edhe për Procesin e Berlinit, duke thënë së është i rëndësishëm për vizionin e përbashkët të rajonit.
Ai përkujtoi se së fundmi janë nënshkruar tri marrëveshje.
Ai tha se SHBA-të kanë bashkëpunim të shkëlqyeshëm me gjashtë vende, por se nuk kanë marrëdhënie të mira reciproke mes tyre dhe se Uashingtoni i sheh tashmë si pjesë të Bashkimit Evropian dhe beson se procesi duhet të jetë më i shpejtë dhe se nuk mjaftojnë vetëm sinjalet, por nevojiten edhe hapa më të qartë.
“Vendet e Ballkanit Perëndimor tashmë janë europianë, kulturalisht dhe historikisht i përkasin Europës dhe ekonomikisht po afrohen. Do të doja që procesi të përshpejtohej, që vendet e Ballkanit Perëndimor të merrnin më shumë pjesëmarrje në strukturat evropiane”, u përgjigj Escobar i pyetur nëse ka një rrugë që do të bëjnë vendet e rajonit për t’u anëtarësuar në BE.
“Qëllimi përfundimtar për të gjithë në rajon duhet të jetë anëtarësimi në BE”.
Kur u pyet nëse SHBA do të merrte drejtimin në atë proces, Escobar tha se nuk besonte kështu.
Dialogu, siç theksoi ai, duhet të zhvillohet në BE, duke pasur parasysh se të gjitha vendet e rajonit kanë aspirata drejt anëtarësimit në BE. /tesheshi.com/
