8 C
Pristina
Thursday, April 25, 2024

Turqia forcon agjencinë e zbulimit

Më të lexuarat

Parlamenti turk po shqyrton një ligj të ri, i cili zgjeron në mënyrë dramatike pushtetin e Agjencisë Kombëtare të Zbulimit, që njihet me inicialet, MIT. Ligji i propozuar fuqizon agjencinë e zbulimit, për t’i dhënë asaj qasje ndaj të dhënave, përfshirë ato bankare, të kompanive dhe individëve. MIT po ashtu do të ishte e aftë të kryente operacione kundër çdokujt që konsiderohet se përbën “rrezik për sigurinë kombëtare”.

Ligji i propozuar është bërë objekt kritikash të forta nga grupe të të drejtave të njeriut dhe mbrojtës të ligjit.
Përballë kritikave të forta qeveria ka bërë disa lëshime, duke hequr kontrollin e drejtpërdrejtë të agjencisë nga kryeministri. Po ashtu, ndëshikimi për personat që shkruajnë për aktivitetin e MIT-së u pakësua nga 12 vjet, në 9 vjet burgim.
Por kritikët thonë se ligji është shkruar në mënyrë të paqartë, duke e bërë të vështirë për njerëzit që të kuptojnë me saktësi se kush e shkel ligjin për raportim tek MIT.
Por qeveria turke argumenton se zgjerimi i kompetencave të agjencisë është i nevojshëm në betejën kundër asaj që ajo e cilëson si ekzistencë e një shteti parallel në Turqi. Kryeministri Recep Tayyip Erdogan citon me këtë rast përkrahësit e studjuesit islamik Fetullah Gulen, i cili jeton në mërgim në Shtetet e Bashkuara, duke thënë se ata kanë depërtuar tek sistemi i drejtësisë dhe tek policia dhe po përpiqen ta heqin atë nga pushteti përmes akuzave të pabazuara për korrupsion. Gulen i mohon me forcë këto thënie.
Dhjetorin e kaluar, prokurorët filluan disa hetime lidhur me akuzat për korrupsion dhe që nga ajo kohë, telefonatat që thuhet se janë regjistruar mes zotit Erdogan dhe djalit të tij, ku ata flasin për mënyrat se si t’i fshahin një sasi të madhe parash, janë publikuar në internet. Qeveria turke thotë se regjistrimet janë manipular me qëllim dhe ka fajësuar për këtë Gulen.
Vëzhguesit thonë se ligji i ri i zbulimit do t’ia lehtësojë agjencisë MIT përdorimin e forcës kundër lëvizjes së Gulenit.
Ky ligj pason hapat e qverisë për zgjerimin e kompetencave për kontrollin e gjyqësorit dhe internetit. Por Asli Aydintasbas, gazetar në gazetën turke Milliyet thotë se këto lëvizje ligjore në fund do të provohen se janë kundërproduktive për kryeministrin.
“Ai po përpiqet të kufizojë përdorimin e internetit, të gjyqësorit dhe të zgjerojë autoritetin e tij për agjencinë e zbulimit. Kjo po forcon perceptimin se Turqia po bëhet përherë e më tepër një shtet autoritar. Pra, ndërsa këto metoda mund ta ndihmojnë atë, duke i dhënë mjete për të luftuar prokurorët, apo përhapjen e lajmeve në internet, në afat të gjatë mendoj se ky është fillimi i rënies së tij.”
Megjithë kritikat ndaj ligjit që zgjeron autoritetin e agjencisë së zbulimit, qeveria është përkushtuar në miratimin e ligjit, duke thënë se ai është i nevojshëm për sigurinë e vendit.
Kryeministri Erdogan akuzoi për regjistrimin e bisedave të tij me të birin fuqitë e huaja, pa bërë specifikime. Vëzhguesit thonë se trazirat që po ndodhin në jetën politike të Turqisë janë duke u thelluar./oranews/kohaislame

- Advertisement -spot_img

Më tepër

Të fundit