11.5 C
Pristina
Thursday, March 28, 2024


Türkiye thërret ambasadorin suedez lidhur me dhënien e lejes për djegien e Kuranit pranë ambasadës turke në Stokholm

Më të lexuarat

Sipas policisë së Stokholmit, Rasmur Paludan-it, lider i partisë daneze të ekstremit të djathtë ‘Stram Kurs’, iu dha leje për të djegur Kuranin jashtë ambasadës turke në Stokholm

Türkiye thërret ambasadorin suedez lidhur me dhënien e lejes për djegien e Kuranit pranë ambasadës turke në StokholmFoto: AA/Arkiv


Ministria e Punëve të Jashtme e Türkiyes ka thirrur ambasadorin suedez në Ankara, Staffan Herrstrom, lidhur me dhënien e lejes nga Suedia për një akt të planifikuar të djegies së Kuranit pranë ambasadës turke në Stokholm, raporton Anadolu Agency (AA).

Sipas burimeve diplomatike, ambasadorit Herrstrom iu përcoll se Türkiye “dënon fuqishëm këtë akt provokues, që në mënyrë të qartë është një krim i urrejtjes, se qëndrimi i Suedisë është i papranueshëm, se Ankaraja pret që akti të mos lejohet dhe se fyerjet ndaj vlerave të shenjta nuk mund të mbrohen nën maskën e të drejtave demokratike”.

Burimet theksuan se Türkiye paralajmëron Suedinë se lejimi i aktiviteteve propagandistike, të cilat qarqet e lidhura me PKK-në po përgatiten t’i kryejnë në Stokholm gjatë ditës së nesërme, është “shkelje e qartë” e marrëveshjes trepalëshe.

Sipas policisë së Stokholmit, Rasmur Paludan-it, lider i partisë daneze të ekstremit të djathtë ‘Stram Kurs’, iu dha leje për të djegur Kuranin jashtë ambasadës turke në Stokholm.

Ndërkohë, ministri suedez i Punëve të Jashtme, Tobias Billstrom, shprehu shqetësim se demonstrata rrezikon të vonojë më tej ratifikimin e Türkiyes për aplikimin e Suedisë për anëtarësim në NATO. Megjithatë, ai tha se do të ishte “shumë e papërshtatshme” që ai të apelonte që një person të mos lejohet të mbajë një demonstratë.

Suedia dhe Finlanda në muajin maj aplikuan zyrtarisht për t’u bashkuar me NATO-n, një vendim i shkaktuar nga lufta e Rusisë kundër Ukrainës që filloi më 24 shkurt të vitit të kaluar.

Por Türkiye shprehu kundërshtime, duke akuzuar të dy vendet se tolerojnë, madje edhe mbështesin grupet terroriste, përfshirë PKK-në dhe FETO-n.

Qershorin e vitit të kaluar, Türkiye dhe dy vendet nordike nënshkruan një memorandum në një samit të NATO-s për të adresuar shqetësimet legjitime të sigurisë së Ankarasë, duke i hapur rrugën anëtarësimit të tyre në aleancë.

/aa/

- Advertisement -spot_img

Më tepër

Të fundit