Në një intervistë me Politico, Donald Trump e përshkroi Evropën si një grup kombesh “në shpërbërje” të udhëhequra nga njerëz “të dobët”, duke kritikuar aleatët tradicionalë të SHBA-së për dështimin e tyre për të kontrolluar imigracionin dhe për t’i dhënë fund luftës në Ukrainë.

Ai tha se do të mbështeste kandidatët politikë në Evropë që përputhen me vizionin e tij.

“Mendoj se janë të dobët”, tha presidenti i SHBA-së për udhëheqësit politikë të Evropës. “Por gjithashtu mendoj se duan të jenë kaq politikisht korrektë. Mendoj se nuk dinë çfarë të bëjnë”, shtoi ai. “Evropa nuk di çfarë të bëjë, nuk dinë çfarë të bëjnë për tregtinë.”

Kritika e Trump-it ndaj udhëheqësve evropianë vjen në një kohë kritike për negociatat mbi luftën në Ukrainë, pasi udhëheqësit evropianë shprehin shqetësim në rritje se presidenti i SHBA-së mund ta braktisë Ukrainën dhe aleatët e saj ndaj agresionit rus. Në intervistë, Trump nuk ofroi asnjë siguri për evropianët për këtë çështje dhe tha se Rusia është qartësisht në një pozicion më të fortë se Ukraina.

“I njoh shumë mirë. I njoh udhëheqësit e mirë, i njoh udhëheqësit e këqij. I njoh ata të zgjuarit, i njoh budallenjtë. Ka disa vërtet budallenj, nuk po bëjnë një punë të mirë. Evropa nuk po bën një punë të mirë në shumë mënyra”, shtoi ai.

Kur u pyet nëse do të përfshihej në zgjedhjet evropiane, ai tha: “Dua të qeveris Shtetet e Bashkuara. Nuk dua të qeveris Evropën. Kam qenë shumë i përfshirë në Evropë.”

Lidhur me faktin nëse do të merrte në konsideratë përfshirjen në disa nga këto zgjedhje për të vendosur udhëheqës që i konsideron më të përshtatshëm, ai tha: “Epo, unë do të mbështesja… Kam mbështetur njerëz, por kam mbështetur njerëz që shumë evropianë nuk i pëlqejnë. Kam mbështetur Viktor Orbán. Kam mbështetur… le të kthehemi te Amerika e Jugut, Amerika Latine… Amerika e Jugut, Milley, Argjentina.”

Lidhur me NATO-n, ai theksoi: “Ka vende që janë të vështira për NATO-n. Jo se nuk duhet të jenë, mendoj se është mirë që i kemi. Turqia është një shembull. Erdogan është një mik i imi, sa herë që kanë një problem me të, më kërkojnë ta telefonoj sepse nuk mund të flasin me të. Ai është një burrë i ashpër, në fakt, më pëlqen shumë. Mendoj se ai ka ndërtuar një vend të fortë, një ushtri të fortë. Por ata e kanë të vështirë të merren me të dhe më kërkojnë ta telefonoj. Dhe unë e telefonoj dhe gjithmonë ia arrij.”

Ukraina

Lidhur me luftën në Ukrainë, ai pretendoi se kishte propozuar një draft të ri marrëveshjeje paqeje që disa zyrtarëve ukrainas u pëlqeu, por që vetë Zelensky nuk e kishte marrë ende në konsideratë. “Do të ishte mirë nëse ai do ta lexonte,” tha Trump. Zelensky u takua të hënën me udhëheqësit e Francës, Gjermanisë dhe Mbretërisë së Bashkuar dhe vazhdoi të shprehte kundërshtimin e tij ndaj dhënies së territorit ukrainas Rusisë si pjesë e një marrëveshjeje paqeje.

Presidenti amerikan tha se nuk shihte shumë kuptim në rolin e udhëheqësve evropianë në përpjekjen për t’i dhënë fund luftës: “Ata flasin, por nuk prodhojnë rezultate dhe lufta thjesht vazhdon.” Në një sfidë të re ndaj Zelensky-t, i cili duket i dobësuar politikisht në Ukrainë nga një skandal korrupsioni, Trump përsëriti kërkesën e tij që Ukraina të mbajë zgjedhje të reja.

“Ata nuk kanë pasur zgjedhje për një kohë të gjatë,” tha Trump. “E dini, ata flasin për demokracinë, por po arrijnë në një pikë ku nuk është më demokraci.”

“Është një luftë që nuk duhej të kishte ndodhur kurrë. Sinqerisht, nuk do të kishte ndodhur nëse do të isha president, dhe nuk ndodhi për katër vjet. E pashë të ndodhte dhe thashë, uau, ata do të shkaktojnë probleme këtu. Dhe filloi dhe, sinqerisht, mund të ishte shndërruar në Luftën e Tretë Botërore. Mendoj se ndoshta nuk do të ndodhë tani. Mendoj se nëse nuk do të isha president, mund të kishim Luftën e Tretë Botërore.”

Ai theksoi gjithashtu se “Putini nuk kishte respekt për Bidenin dhe nuk ka respekt për Zelensky-n, nuk e pëlqente Zelensky-n. Ata me të vërtetë e urrejnë njëri-tjetrin. Dhe një pjesë e problemit është se ata e urrejnë njëri-tjetrin kaq shumë, e dini. Dhe është shumë e vështirë për ta të përpiqen të bëjnë një marrëveshje. Unë… kam zgjidhur tetë luftëra… Unë bëj marrëveshje. Kjo është e vështirë. Një nga arsyet është se niveli i urrejtjes midis Putinit dhe Zelensky-t është i madh.”

Amerika Latine

Ndërsa ka thënë se po ndjek një axhendë paqeje jashtë vendit, Trump ka thënë se mund të zgjerojë më tej veprimet ushtarake të administratës së tij në Amerikën Latine kundër objektivave që ai thotë se janë të lidhura me tregtinë e drogës. Trump ka vendosur një forcë të madhe ushtarake në Karaibe për të goditur trafikantët e dyshuar të drogës dhe për të ushtruar presion mbi regjimin autoritar të Venezuelës.

Në intervistë, ai refuzoi vazhdimisht të përjashtonte dërgimin e trupave amerikane në Venezuelë si pjesë e një përpjekjeje për të rrëzuar Maduron, të cilin Trump e akuzon për eksportimin e drogës në Shtetet e Bashkuara. Disa udhëheqës të së djathtës amerikane e kanë paralajmëruar Trump-in se një pushtim tokësor i Venezuelës do të ishte një vijë e kuqe për konservatorët që votuan për të, pjesërisht për t’i dhënë fund luftërave jashtë vendit.

“Nuk dua ta përjashtoj ose ta konfirmoj. Nuk po flas për këtë,” tha Trump për dërgimin e trupave, duke shtuar: “Nuk dua të flas me ju për strategjinë ushtarake.”

I pyetur nëse do të donte të shihte Maduron të larguar nga pushteti, ai tha se “ditët e tij janë të numëruara”.

Në të njëjtën kohë, ai tha se do të shqyrtonte përdorimin e forcës kundër objektivave në vende të tjera ku tregtia e drogës është veçanërisht aktive, si Meksika dhe Kolumbia. “Sigurisht, do ta bëja”, tha ai.